汪明荃（阿姐）的演唱會前晚在紅館開鑼，年屆60的阿姐穿上華麗服裝勁歌熱舞，又與男友羅家英合唱。家英哥大讚她是無價寶，又要求阿姐錫錫，羞澀的阿姐也順應男友，在台上公然錫錫。
汪明荃前晚在紅館開騷，邀請了男友羅家英、草蜢及粵劇名伶吳仟峰擔任嘉賓。為了支持女友，家英哥特地趕回港擔任表演嘉賓，每當阿姐落台換衫時，他就上台表演。
「啜啖得唔得」
家英哥說：「阿姐係無價寶，20年前開始認識佢，阿姐當時40歲，今年佢已經60歲，但佢好勇敢，從來唔怕俾人知佢幾多歲，作為佢男人嘅我，多少有啲辦法同佢相處，最重要係識得返屋企。我特登買間屋喺佢隔籬，就係等佢知道我有返屋企；其次就係唔可以畀女人攰，佢攰就要幫佢按摩；第三唔可以畀女人喊；第四要完成阿姐嘅夢想，阿姐好有才華，我從來唔介意俾佢叻過我，做男人點可以咁小器。」
到安哥時，阿姐與家英哥一齊出場合唱，一曲既罷，家英哥溫柔地問阿姐：「啜啖得唔得？」阿姐聽後就帶點羞澀地親吻對方，兩人在台上打情罵俏，看得觀眾不斷喝采。
「以後鬧少啲」
散場後，阿姐接受傳媒訪問，家英哥十分識做地為她按摩，對於個唱表現，阿姐說：「我覺得值70分啦！跳舞嗰度唔係咁夠放。」至於家英哥讚她是無價寶，阿姐甜絲絲說：「我對佢係無以為報。」在旁的家英哥立刻插嘴說：「咁以後鬧少啲啦！」
採訪：王連連
攝影：陳俊強
