無綫60集長劇《歲月風雲》今晚進入最後10集倒數,飾演癡情少爺的林峯在劇中全方位被「恰」,感情上被佘詩曼玩殘,事業上又遭陰濕佬馬德鐘打謝,為了令角色看起來如同「低能仔」,林峯直認演得辛苦兼壓力大,而且忍不住慨嘆此角色犯賤。
無綫重頭劇《歲月風雲》終於播到戲肉,劇中飾演富家子華振邦的林峯,角色前段吃喝玩樂,永冇搞作,但搭上奸妹佘詩曼及被大反派馬德鐘連番追打後,人生屢逢挫折,厄運纏身10幾年,角色演繹頗有難度。
寄望台慶奪獎
雖然林峯未有信心憑此劇奪今年台慶最佳男主角,但有華振邦加《溏心風暴》程亮雙龍出海,故林峯也對「我最喜愛的男主角」一獎虎視眈眈,他說:「最佳男主角論資排輩都未到我,入到前幾強都好開心啦,我反而希望今年有機會攞我最喜愛的男主角,我覺得攞咗最佳男主角有壓力,所有嘢都唔衰得,最喜愛男主角可能係觀眾鍾意你本身,呢個moment我想要呢樣嘢。」
不過《溏》劇的「得得地」陳豪由於角色討好,也屬我最喜愛的男主角大熱,問林峯會否視對方為大敵?他說:「仲有兩個月先到台慶,但陳豪今年應該係最佳男主角大熱。」
「馬德鐘好衰」
談到華振邦這角色,林峯直言演得不易,他說:「拍呢套劇好大壓力,角色太癡情又反覆,如果設定有差誤,前後會唔連貫,60集咁長,太多事件發生啦,有時問番你都省唔起,有啲會唔記得,你點連番情緒呀?好辛苦㗎。」華振邦的反覆來自感情和事業,林峯也形容此角色犯賤,他說:「華振邦不停俾人恰,但錯完繼續錯,我盡量唔演到個角色低能,佢EQ唔高,可取係癡情,佢喺感情上犯賤,一個女仔害你,仲害埋你家人,點接受到?佢個人仇恨心咁重,上一代嘅仇都要報?太可怕啦!但阿佘演得好好。」
林峯續說:「華振邦前期係死𡃁仔,唔識死、貪玩,中間遇到好多挫折,阿佘傷得我好犀利,同佢結唔成婚,BB又冇埋,跟住再追佢,又傷多我一次,中間佢有嘗試同胡杏兒一齊,但變咗責任多過愛,總之呢段感情好複雜,後段華振邦喺事業上又有打擊,一路同馬德鐘鬥,但表現唔成熟、衝動,始終對方技高一籌,馬德鐘手段陰濕、好衰,仲害到我差啲坐監,但最後就梗係惡有惡報啦。」
採訪:朱倬誼
攝影:陳偉權
跑車提供:AlfaRomeo
搶先睇:秀風永標庭外和解
《歲月風雲》第51集劇情講述危永標(馬德鐘飾)弄穿榮秀風(佘詩曼飾)的車胎,導致其座駕失控撞向華文翰(劉松仁飾),半身不遂的文翰未有指證秀風,令她十分內疚,每日到醫院照顧文翰,之後更得到華文翰的原諒,秀風跟華家冰釋前嫌。
秀風為了華家,以華家取得車廠主控權為條件,同意與永標庭外和解,永標正式接管危天行的身家,更入股華喆車廠。華文翰出院後重返華喆,永標千方百計打擊他的信心,最後成功令文翰灰心喪氣。