銀行減息,樓市當堂唔同晒,股市又旺,不單止發展商賣樓賣得爽啲,趁勢推盤;無樓在手嘅市民,都加快入市。天水圍栢慧豪園後,冇乜大盤賣,貨尾居多,市區樓受歡迎,恒地(012)嘅土瓜灣翔龍灣,勝在現樓,可即買即住,為招呼睇樓客,現場除咗有得食之外,仲有歌舞表演。
中秋節將至,呢兩日假期,多個商場有連串慶祝活動,去完土瓜灣睇樓,唔想咁早返屋企,就要去九龍灣MegaBox商場。為咗搞吓氣氛應吓節,商場搞咗個以中秋為主題嘅活動,今日起至26日,除咗可以去到個直徑達6呎嘅中秋月光入面影張相留念外,仲可以免費食到十幾款唔同口味嘅精美月餅。
隔籬嘅EMax,亦搞咗個《超能特工狗》及動物醫生大派對,屆時藝人林峯同蒙嘉慧將帶同愛犬到場,同大家分享養狗心得。