巴塞隆拿前晚2:1擊敗西維爾，我求大俠邊睇直播邊喃喃自語：「好邪！」皆因呢場波係魯營球場50周年（周一）前最後一仗，球場即將進行重建計劃；咁啱今仗「細哨」缺陣下，美斯梅開二度拯救球隊，唔通「細哨」時代已成過去？
今場波真係唔覺冇咗「細哨」，亨利、美斯、廸高前場進攻有長有短，耶耶托尼等防守球員又發揮水準，好似美斯73分鐘接應亨利直傳入第1球，就充分體現球隊進攻威力；跟手77分鐘再入12碼，即使簡路廸90分鐘追成1:2，巴塞依然淡淡定袋足3分。
呢個「細哨」又係爭唔落，上場聯賽0:0和奧沙辛拿前一晚，就被爆佢去夜總會玩到朝早6點先歸隊；會長拉樸達亦搵佢照過兩次肺，勸佢操練嗰陣認真啲！教練列卡特今場波對西維爾賽前，見佢狀態麻麻，於是對外宣稱有傷缺陣。睇嚟「細哨」喺巴塞嘅前途真係幾危危乎！
細哨留力博轉投車仔？
講真，巴塞現時中前場個個都係膽，以往「細哨」做膽拖其他腳嘅時代已成過去；唔止咁，巴塞仲有後備嘅杜斯山度士，同埋養緊傷嘅伊度奧。不過，近日有傳阿巴莫域治明年1月會買「細哨」，唔通佢經理人大佬已經度定後路，於是特登扮懶散博走人？
不過都係嗰句：天下無不散之筵席。魯營球場使用50周年後都要重建換個新外殼，巴塞隆拿告別「細哨」時代又有咩咁出奇呢？希望，今次球場總建築師諾曼科士打為魯營打扮得靚靚嘅同時，列卡特亦可以重建一支更強勁嘅超級巴塞啦！