新股排隊上市，箇中不乏內房股，好似有奧園（3883）及SOHO（410）兩隻矚目股份，不過星俠一向對抽新股興趣麻麻，入白表申購中籤率極低，即使分到股份，最多都係得幾手貨仔。
如果借孖展申購，雖然可博獲配較多股份，但潛在風險其實不小，先不論孖展利息，因為只要新股首日升幅夠勁，扣除孖展利息後一樣有「肉」食，最怕係上市日遇着股海氣氛逆轉，一旦跌穿招股價，即時要損手。
年內掛牌首日跌穿招股價的新股不多，最近只係有隻方興地產（817），該股揀8月17日掛牌，不幸碰上年內最大跌市而失守招股價。惟方興業務潛質不俗，股價旋即浮上水面，兼展開升浪。
方興母公司為中化集團，係中國16家獲得國資委批准，以發展房地產為核心業務的中央企業之一，幕後實力雄厚，兼貨源歸邊，可藉業績炒上，短線目標4.3元。