美國減息半厘之後，係人都知美國經濟好大鑊，美元持續下跌，啲錢自然流去商品包括油、金同銀。不過買金買銀唔同存款同債券有息收，亦唔同股票有股息，所以金礦股近期升到癲，紫金（2899）升完輪到招金（1818）、靈寶（3330），到昨日市場終於搵埋隻澳華黃金（1862）炒上去，升15%。
澳華今年3月上市，首日掛牌收市報39.30元，較招股價42.50元低7.25%，成為金豬年首隻破底潛水嘅股票，破底後在35元至40元水平橫行，到咗8月更加因為收購澳洲上市公司，同屬金礦股嘅金華（GoldenChina），急挫至30.25元。噚日先至升穿上市以來高位43.60元。
金礦陸續投產
澳華雖係澳資金礦股，但其實主力係開發中國嘅金礦，純睇業績，出現虧損係因為佢嘅金礦根本未投產，又何來盈利？據證券行報告指，澳華持82%的貴州錦豐礦07年4月才投產，上半年錦豐產出10687盎斯黃金，並售出2581盎斯。截至07年5月，礦石儲量預計達1660萬公噸，含金量為每噸5.7克，蘊藏320萬盎斯黃金。
澳華另持有吉林白山金礦95%權益，集團今年8月正式開發白山，預計項目將在08年底試產並在09年初正式投產，年產量約為70000盎斯黃金，每盎斯的黃金成本將低於250美元。至於剛收購的金華正式係公司主要競爭對手，主要資產除一個位於內蒙的金礦95%外，亦持有貴州另一金礦70%權益，今次透過換股合併，可更有效運用公司資源。睇招股文件，原來澳華已簽訂9份涉及勘採礦場的中外合資協議，其中5份正申請批文，即係話仲會有礦場增加。呢隻金礦股原來唔止炒落後咁簡單。