紅白藍膠袋幾乎係以前港人回鄉必然裝備，惟時移世易，近年股海不時傳有內地人用同一款式膠袋挾巨款來港，到證券行開戶炒港股。講真，內地人挾巨資來港，又點會用紅白藍膠袋，只係傳聞為求營造繪聲繪影效果，難免略帶誇張。
內地股民來港開戶炒股已成「公開秘密」，其實可追溯至01年2月，當時大陸B股開放予內地人購買，消息雖已公佈，但因要作出相應準備，內地人要遲至6月方能入場，由於H股、B股與A股三者互有差價，既有幾個月空檔未買得B股，大陸醒目錢遂透過不同渠道跨境炒H股。
該段歷史，星俠認為與今次「港股直通車」有若干雷同，中秋之後又到國慶黃金周，深滬連日休市，市場預期「直通車」或於「十七大」後放閘。估計不少內地同胞會先行來港探路開戶，故具中資背景的證券股可吼。
申銀萬國（218）升得太多，加上PE又高，梗係追炒第一上海（227）較化算，可吼位上車，短炒目標4.5元。