蒙嘉慧、佘詩曼、歐陽震華同鄭嘉穎等噚日喺將軍澳電視廣播城為主演嘅無綫新劇《法證先鋒II》舉行開廠拜神儀式，監製梅小青仲派利是畀台前幕後嘅工作人員。打開利是後，至發覺裏面原來係張六合彩，但最奇怪係張六合彩竟然過咗期，歐陽震華就負責公佈攪珠結果，結果當然冇人中獎啦！
阿佘甘被碧兒壓
中秋節將到，蒙嘉慧話末知到時使唔使開工，但就自爆係第二年同男友鄭伊健過中秋。問佢有冇準備賀禮送畀鄭伊健嘅父母，佢話：「唔使開工咪買囉，但我見到林峯帶返嚟嘅果籃好名貴，裏面仲有巨峰提子㖭。」近日有雜誌指佘詩曼喺無綫花旦當中，收入只係排第二，俾排頭位嘅廖碧兒出招力壓，阿佘對此話：「我咁瘦，仲要壓扁我，不過佢真係好身材嘅，畀佢壓囉，我自己都好滿意呢幾年嘅收入。」
