有「京版栢芝」之稱的閻清，將於下月擔任韋家輝新片的女主角，故近日努力學跳舞收身，結果盲舂舂撞到周身傷。雖然小事糊塗，但畢業於法律系的閻清，頭腦其實清晰得很，學化妝學粵語學做戲，還計劃報讀法律課程，她說：「我希望做個有學識、識諗嘢嘅人，唔係lady型女藝人。」
來自北京的閻清，樣貌聲線都酷似張栢芝，可是閻清自覺不似，她日前說：「我同佢冇得比，佢有自己一套，我同佢好唔同。我有睇佢嘅戲，覺得佢好放、幾自然，好似《忘不了》同《旺角黑夜》我都好鍾意。」央她講多兩句，她說：「我想拍多啲戲，希望將來可以同仔女講，話呢部戲係我拍嘅！就算做唔到栢芝咁紅，都要有個回憶。」
拒做純情玉女
閻清會否比栢芝更紅，現在還言之尚早，不過她似乎更懂得為自己打算。畢業於北京師範大學法律系，成績中上，加入娛圈後難得未有荒廢學業，現在還不時為同學仔做case、搵資料做preparation，她說：「好多同學都嚟香港讀master，我都好想去美國或者英國讀上去，但都係將來嘅事。」
讀書大計暫時擱置，但其他業餘進修仍可繼續，包括化妝、廣東話和演戲等，堅拒做純情玉女的閻清說：「我希望做個有學識、識諗嘢嘅人。我太高，行唔到細路女路線，唔係lady型女藝人，我要型！」
獨立嚇怕男生
訪問當日，只見閻清手手腳腳青一塊紫一塊，果然好型，她解釋：「之前睇咗部戲係講跳現代舞嘅，我覺得動作好靚，於是喺屋企學跳，點知整到損晒。」可擔心嚇怕追求者？她笑道：「我身邊嘅朋友幾乎個個都係咁，不過香港嘅男仔就比較鍾意lady啲嘅女仔，但我就唔使人保護，反而好鍾意去照顧人，搞到佢哋冇晒優越感。」
閻清即將接拍韋家輝自編自導的新片，首次與劉青雲合作，壓力大增，特別是導演要求她操純正廣東話。記者提議她找個香港男友學粵語，閻清怪叫道：「冇理由為咗咁去搵男朋友㗎，都要夾先得㗎！」
採訪：吳佩思 攝影：陳偉權
髮型：BarryofPark4
化妝：MeggyLi
場地：Anytime（銅鑼灣）
