基金Ｋ到君悅酒店參加CLSA（里昂）嘅全球投資論壇，據講話有一千三百名基金經理/投資大戶參加，佢哋管理嘅基金總額高達十萬億美元，咪話唔大到得人驚。里昂分析師係比較悲觀派，論壇主題竟然係ApocalypseBegins：TheReturnofRisk，好似唔啱聽噃。但如果你諗番以前里昂出過本報告叫做Boomtown，就知道里昂曾經預測得好準確，故此今年主題好有警惕性。
基金Ｋ話里昂認為信貸市場收縮，最終會拖累整體經濟，拉低股市指數。呢一個論點，與基金Ｋ想法相同，佢完全收貨。聽過討論吃茶點休息之際，基金Ｋ自君悅酒店望出去，見到尖沙嘴文化中心如一幅公廁高牆，阻擋視線，不禁低聲喊一句：Whataneyesore！
食晚飯時，基金Ｋ同我哋講：「文化中心外形好難睇，其實西九龍他日興建十幾項演藝設施，包括劇院、音樂廳，有冇辦法向政府反映，等西九設施落成之後，就將文化中心拆咗佢，改建甲級商業大廈呢？」左丁山大笑：「你想俾人鬧死咩？」基金Ｆ立即附和基金Ｋ之言：「喂，諗真吓先，平時一啲世界級表演，票價貴到死，如果要滿座，搵邊啲人去睇先！現實啲講，好多係外資大銀行贊助，而贊助人大量派飛請客。此非香港獨有，倫敦如此，紐約如此，香港唔會例外。將來西九文娛藝術區如果唔想冷清清、慘淡經營，就必須有大量外資、中資、港資機構贊助支持。但現在甲級商廈啲租金咁貴，摩根史丹利都要搬去西九龍，而西九龍在規劃中有嚴格地積比率限制，唔見有新款大型寫字樓大廈出現，咁啲大公司去邊度租地方？搬去上海呀，或新加坡呀？將太空館、文化中心搬去西九龍，搬入更靚、更好音響嘅地方，騰出空地起甲級寫字樓，豈非兩全其美？」咁嘅構思，必定有人反對，拖足十年都似，特區政府恐怕無此意欲。
基金Ｋ之想法，未必有人聽得入耳，正如里昂嗰位JimWalker博士叫人在呢個時候趁高沽貨鬆人，以避股災，邊有人會照做呀。