就嚟上市嘅中國動向（3818），主要喺中國同埋澳門賣意大利運動品牌Kappa嘅產品。對於唔熱衷運動嘅讀者嚟講，可能唔多識Kappa同埋中國動向，但提到中國體操王子，大家應該一口嗌出李寧。要講中國動向，就要由下咗海嘅王子講起。
話說，中國動向前身，係上市公司李寧（2331）嘅間接非全資附屬公司北京動向，董事長陳義紅本來同李寧打工，貴為執行董事兼高層人員，後來另起爐灶，買咗擁有Kappa中國同澳門獨家分銷權嘅北京動向自己打江山。
故事講到呢度，有睇開電視劇嘅朋友，應該會將《歲月風雲》、《溏心風暴》劇情自動加插入以上情節。究竟係咪拍檔反目，搞到要另起爐灶？
劈炮自己打江山
華華問過陳義紅，佢話91年經朋友介紹入咗李寧，15年間由副總經理做到執董，佢嘅第一桶金，都喺呢間公司搵到。前年9月決定自立門戶，都有唔少人吟佢，話將近50歲人唔掂就「衰收尾」，不過陳義紅話：「人光着來，光着走，冇乜大不了，最緊要有老婆撐！」反目情節欠奉，但夫妻情重同樣吸引。
58年出世嘅陳義紅，父母都係軍人，所以細細個就想做將軍，當咗5年兵，之不過唔係正統軍校出身，冇得留低！佢諗過做運動員，皆因自細對「波」興趣好大，足球、籃球、排球、乒乓球樣樣啱，但張張刀都唔利，做唔成運動員；最後從商，搵到自己條路。
佢話之前喺大學做行政管理，薪高糧準，但見到身邊朋友個個下海從商好掂，所以88年自己都「跳海」入商界，開頭喺高幹子弟打骰嘅「康華」做經理；89年轉去銷售「十佳」品牌運動用品嘅企業。之後嘅事，大家都知啦。