有「紐約股壇長毛」之稱嘅EricKnight，近日不斷公開叫獅子行改組，又要滙控（005）大班葛霖「坐歪」，轉做非執行主席。飽受股價低沉壓力嘅滙控，睇怕都幾頭痕。不過，獅子行作為百年老店，始終唔係「流」嘅，集團有亮麗業績交，大班、二班亦嘔心瀝血服務股東，粉絲投資者講到底都會慧眼撐管理層。
非執董一致撐大班
噚日英國《金融時報》就披露，滙控獨立非執董、身兼勞斯萊斯汽車主席嘅SimonRobertson立場。報道話，佢同紐約長毛見過面，原本EricKnight寄望，呢位重量級獨董可以發動迫宮，帶領滙控全面檢討政策，殊不知Robertson回覆紐約長毛話，集團所有非執董一致同意，繼續由葛霖以執行主席身份掌舵滙控，又話𠵱家毋須檢討集團策略喎。
報道仲引述其中一名滙控非執董，寸番EricKnight，話獅子行已經奠定以新興市場做引擎嘅發展策略，紐約長毛提出嘅寶貴意見，似乎遲嚟咗成年。