82年10月3日《Macross》日本首播。到香港亞視２年後播放時，我3歲。80年代亞視厲害，到92年無綫才播Macross84年劇場版《可有記起愛》。編輯說自己看《Macross》大，我太遲出世。縱記起馬輝、美沙和明美的三角戀事，但今天翻看，才感受到Macross浪漫的一面。玩具商照顧大家集體回憶，25年後推出新品，問大家一句「可還記起我」，答案是：山口式韋基利1J到港即時熱賣，為25周年產品潮掀起序幕！
記者︰陸俊雄
攝影︰伍慶泉、陳盛臣
山口×超時空熱賣
筆下寫過山口式不止一次，再提起，因近日最紅正是它的VF-1J，電視版前期馬輝（一条輝）的專用機。承Macross25周年，本月出1J、下月出1S，再下個月是《可有記起愛》的骷髏1A，山口式是誘人的吸血鬼。1J其實早在只見官圖時，從網民反應激讚配件多，已知將會大賣。結果我買時$105，一天後$118，更甚見過$130，非特別版一日升三成算係罕見！但計番最多升$30亦負擔得起，所以依然熱賣。
25周年出新作《MacrossF》
Macross25周年，香港先來山口，日本就大量產品蓄勢待發，已知12月有兩隻黑金色紀念版Yamato推出，包括1:48的VF-1S和1:60源自94年《MacrossPlus》的YF-19，約售$900和$1,200。此外，福卡的VF-1S亦會再版，預計約售$800，在Yamato系列中不算貴。除了玩具，日本早在8月18日舉行了名為「MinmayMeetsFireBomber」的25周年演唱會，動漫雜誌《NewType》7月號也提及過。當年替明美配音的飯島真理出山唱歌外，更重要是挑選最新歌姬，結果選出了中島愛，為10月Macross新作《MacrossFrontier》的女主角RankaLee作聲音演繹。如此大費周章，明星+變形機械人，Macross始終走不出這個方程式。
Fans：明美盒蛋最搶手
「女人邊個唔善變？特別係靚嘅女人。」收藏Macross物品近20年的阿偉︰「明美善變，但我鍾意。80年代卡通入面竟然出現一段三角戀，當年來講係超創新。」說罷拿來一堆明美做封面叫CMs的盒蛋，有3Parts和一款特別版，約4年前開始推出，有明美公仔。特別是Part1，一套六盒當年售$280，現在約值$1,000，盒蛋中極少如此值錢︰「其實所有關於明美的東西，大家都收起晒好難買到。」原來如此，明美果然不只迷倒祖拿達星人。
阿偉再拿來84年《可有記起愛》的明美和馬輝公仔，這時已感到他對往後的Macross興趣不大︰「舊版好睇好多，後期Macross7睇了兩次都唔知佢想點，之後到《Zero》因為CG畫面勁靚，先令Macross有番起色。」忽然阿森插嘴︰「《Zero》得嗰5集就完，仲要隔4個月先播一集。」似乎Fans都對後期Macross作品有微言，那就希望10月的25周年新作推出時，不要令這位死忠Macross迷再跌眼鏡吧！
玩具舖老闆：最想搵番陳慧嫻配音版
專賣Macross玩具的夢幻島老闆阿森，本身是Macross迷︰「當年F-14可以變做機械人，係好神奇的事，連《變形金剛》都要買VF-1S。」沒錯，孩之寶那時計劃出一隻變形飛機，於是買了1S版權，照出一隻叫天火。阿森繼續說︰「我最記得麥斯在機舖打機識美娜嗰幕，咁樣溝到女仲唔厲害？兩夫婦又打得，佢哋對一紅一藍戰機我最鍾意。」
男士愛看機械人打鬥好正常，估不到阿森還有另一番見解︰「《可有記起愛》當年已經識得用大量流行曲，講用愛感動人，邊套卡通比得上？」不只這樣，阿森鍾情到︰「呢套劇場版已經買過4至5隻碟，最想搵番陳慧嫻配音版本，可惜買極唔中。」要知那時陳慧嫻當紅，由她為明美配音最好不過，特別是那7分鐘最後之戰，以明美歌聲伴戰，馬輝射爆波特爾沙是經典中的經典。相信慧嫻版本的《真情流露》，現時只在YouTube才找到。
早瀨未沙
女軍官，為一条輝上司。80年代動畫寫姊弟戀，都幾前衞。
一条輝
本為飛機特技員，後來在Macross上參與戰爭，不小心愛上一個善變又美麗的女人，幸好與早瀨未沙喜劇收場。
明美
在太空堡壘上被選為MissMacross，踏上星途。與一条輝發生一段情，是美麗善變又悲劇的人物。
售賣點︰
a）ToyZone（28826850）
地址︰銅鑼灣糖街3號銅鑼灣商業大廈16樓1601室
b）夢幻島（31767013）
旺角亞皆老街107-111號皆旺商場3樓311號舖