昨日炒到二三線國企股以及直通車受惠股，因市傳港股直通車快將開通。市場消息是否屬實要睇多幾日，不過從金管局總裁任總於今期《觀點》所講內容，可見任總用咗唔少心機詳述港股直通車誕生的緣由及大力支持，攞完彩，應該會好快公佈。
文章由內地國際收支盈餘越來越龐大講起，人民幣升值壓力下，導致內地外滙儲備迅速增長，再而導致貨幣基礎，即商業銀行在人行所持的人民幣結餘迅速擴大，帶來貨幣擴張效應及通脹步伐加快。因此，人行要收緊貨幣政策，不過現時存款準備金率與歷來最高的13%相距不遠，而增發票據只會令商銀股東回報下降。至於加息反會令更多資金流入，人民幣升值壓力更大。
結論係，透過港股直通車進一步開放資本賬，係解決人仔升值等問題嘅最重要一步。所以話，直通車一定會開，爭在細節幾時搞掂而已。炒北水流至，除紅色股外，一定係炒港股唯一買賣平台嘅港交所（388），加上有政府呢個潛在大買家，論穩健性其實勝於炒騎呢國企。
已轉型水務環保股嘅中國光大國際（257）早兩日獲大摩唱好睇3.99元，噚日公佈中期業績果然對辦，上年半股東應佔溢利大增95%至1.67億元，每股盈利5.44仙。
光國中期業績對辦
今年上半年集團環保業務之垃圾處理量達21萬噸，去年同期項目在建設中；污水處理量1.3億噸，去年同期為5977萬噸，環保業務處理量大幅增長，令期內環保業務營業額比去年同期增47%，佔總營業額90%。留意以上業績只係反映部份項目投產後表現，到08年全部投入營運，便會發現原來光國咁抵買。