第44屆金馬獎噚日截止報名，李安嘅《色，戒》同姜文嘅《太陽照常升起》都係最後一日報名，其中男主角獎項競爭最激烈，劉德華同梁朝偉今年將再度展開對決，各有兩套戲報名，偉仔仲有部《傷城》，華仔就有《門徒》同埋《墨攻》；上屆金馬影帝郭富城嘅《C+偵探》都加入戰局，報名最多嘅係余文樂同房祖名，佢哋各有三套戲報咗名。周杰倫自編自導自演嘅《不能說的．秘密》，報名最佳男主角、最佳導演、最佳原創電影音樂以及最佳原創電影歌曲四個獎，係個人獎項報名最多嘅一個。
內地版剪7分鐘
女主角方面，李心潔、劉若英、陳冲、舒淇、張艾嘉、林嘉欣、范冰冰同桂綸鎂等都有電影報名，入圍名單下月27日公佈，頒獎禮12月8號舉行。
此外，李安同湯唯將於今晚抵港宣傳《色，戒》，有份投資呢套戲嘅FocusFeatures透露，內地版《色，戒》由李安親自剪輯，大概只少咗7分鐘戲份，主要係露點鏡頭，消息話內地會喺10月26日上映。李安周日將返台宣傳，噚日台灣新聞局話下星期二將頒發1,000萬新台幣（約250萬港元）獎金畀李安。
