無綫姐仔陳敏之早前到湖南參加舞蹈大賽，由於壓力及運動量甚大，結果竟一瘦不可收拾，體重暴減10磅，全身骨杉杉，瘦得鎖骨高聳，雙臂幼如兩支棍，真是我見猶憐。所謂瘦在女身、痛在母心，難怪陳媽媽日日狂煲老火湯，實行以愛心湯水谷肥女兒。
有無綫高妹之稱的陳敏之，身高5呎8吋，但現時其體重僅得109磅，十分纖瘦。以往敏之同樣身形偏瘦，但仍擁有包包面，不過早前她在中環接受本報專訪時，卻變得瘦骨嶙峋，面形甚尖，鎖骨及肩骨凸出，雙臂幼如柴枝，即使穿着細碼衫褲，依然「有位出租」。
阿媽狂煲湯
原來敏之因要代表無綫參加湖南電視比舞節目《舞動奇跡》，賽前壓力甚大，加上每天不停練舞，運動量大增，才令她食極唔吸收，一下子暴瘦10磅，敏之說：「呢排瘦得咁快，係之前不停排舞，呢個比賽幾有壓力，自己又緊張，我已經食好多嘢，但瞓得唔係太好，個人可能唔吸收啦。」
其實敏之出發前有點喉嚨痛，身體較虛弱，故此陳媽媽看見女兒激瘦後當然大感心痛，馬上源源不絕為愛女送上愛心老火湯補身，敏之笑說：「呢排媽咪都煲好多湯水，好似有雪耳淮山魚湯、鮑魚響螺湯、紅蘿蔔豬骨湯，但我最鍾意都係飲番茄薯仔湯，去湖南前我都飲好多，同埋驚湖南嘅食物比較辣，都帶定杯麵過去，有時間就行吓嗰邊嘅超市買生果。」
非首次激瘦
見敏之瘦得骨杉杉，實在叫人擔心，她苦笑說：「你睇我隻手，成支棍咁，其實都唔係第一次啦，我20歲做小室哲哉徒弟時，有次喺紅館表演，我一世人都未踏足過紅館舞台，嗰次都係一個月內瘦咗10磅，之後就回復番正常，我𠵱家都完成湖南嘅賽事，應該會慢慢肥番嘅。」
採訪：朱倬誼
攝影：仇志德
化妝：RaymondYip
髮型：D.Y@HairCulture
服裝提供：SistyrMoon
場地：CaliforniaRestaurant
