廖碧兒近期獲封為TVB最賺錢女星，日日出動做騷剪綵搵真銀。她前晚性感低胸在金鐘行騷，又大賣口乖，原來她擔起頭家絕不易，單單五隻小狗已經月花數萬元，難怪她要密密出擊搵銀。
廖碧兒前晚在金鐘為西武行騷，與14位男女模特兒一同演繹60套新裝，品牌包括ChristianLacroix、RebeccaTaylor、PaulSmith及adidasbyStellaMcCartney等日裝、運動服和晚裝。廖碧兒穿上純白DeepV晚裝，甜笑低胸壓軸，但做訪問時馬上穿皮草收起性感。
倫敦狂掃冬裝
碧兒直認多工作，並且賣口乖說：「因為開季，又有劇出，好開心行呢類騷，平時冇時間shopping，𠵱家可以一次過睇晒啲靚衫，買嘢又可以帶旺香港經濟。」
早前碧兒在英國倫敦遇上大減價，所以狂掃冬裝，她說：「其實我𠵱家使得最多錢係喺啲狗身上，每個月花幾萬蚊，因為生咗幾隻小狗，全家總動員接送兼照顧，狗BB又易病，又要打防疫針，一支針都要2,000幾蚊，一家五口真係好使錢。」
一件可造三件
視小狗如己出的碧兒，更做埋慈母為「仔女」造衫，她說：「我成日將自己嘅衫改畀狗仔着，好似Nike送嘅衫，一件可以改造三件狗衫，又環保、又慳錢、又係我嘅新興趣！」
問到男友陳豪身形高大，舊衫豈不可以一開五？碧兒即笑住嫌棄說：「佢嗰啲唔襯呀！」
採訪：RitaLeung
攝影：MatthewLam
