格林斯潘似有神機妙算，或者有天意安排，佢本回憶錄TheAgeofTurbulance啱啱在九月十八日前幾日出版，為配合新書推銷，格林上電視台，接受英國報紙、美國報紙訪問，聲勢如鋪天蓋地，令全世界注視之餘，亦聚焦於現任聯儲局主席伯南克，究竟佢在九月十八日會如何處理減息問題（按：減息半厘）。有咁樣嘅上任主席搶鏡頭，伯南克只可以嘆一句：「誠屬不幸。」
青姐乃有心也，一早去書局訂書，仲訂多幾本，送畀老友記。九月十七日下午，青姐第一時間將本格老回憶錄送上左丁山寫字樓，真係多謝晒。本硬皮精裝新書，厚達五百三十頁，係「特別亞洲版」，內有特別為亞洲經濟而寫嘅文字，一時之間冇法子讀得清楚，睇怕要等到一個清閒日子，先至有時間咀嚼。
晚上到上海總會食晚飯，聽基金K、賓架W講大市，賓架W話股票市場喺一個月內升咗六千點（自八月十七日計起），創歷史新高，早已把次按風暴置於腦後，好似打完風後陽光普照，風平浪靜，大家一齊再玩鋪勁嘅。但在銀行拆息/信貸市場，八號風球仍然懸掛，拆借困難，利率推高，話有creditcrunch（信貸收縮），並非虛言。但世界性銀行體系之緊張，投資者似乎睇唔見，照樣狂買股票，令佢好奇怪。
基金K話呢啲係股市與貨幣市場「脫線」（disconnect）現象，佢做基金經理二十幾年，心為之危，已經盡量唔買股票，故此佢嘅基金大大跑輸大市，好彩佢老早向基金投資者說明佢嘅風格與投資哲學，投資者仍然支持，並無「贖回」，但亦無新資金流入。
國際貨幣市場收縮之下，第一個犧牲品係英國NorthernRock按揭銀行，呢間銀行遭受擠提，遲早玩完，會被其他銀行以低價收購拆骨，其股東損失慘重，但存戶就得到英國政府保證存款無缺。NorthernRock玩完，英超聯球會紐卡素會受到打擊，因為紐卡素球衣就係寫上northernrock兩個大字，以後是否可以收足贊助費呢？