數碼達人：東京遊戲展開鑼<br>PS3戰車列陣　搶鍊《GT5P》

數碼達人：東京遊戲展開鑼
PS3戰車列陣　搶鍊《GT5P》

睇過電影《東京飄移》，兩車位處澀谷站中間的交滙點片車，呢種感覺，唔使試，齋睇已經夠爽！昨日係東京遊戲展（TGS）DAY1，全場最熱鬧、最多人圍嘅又係賽車！冇錯，佢係遊戲機界「車神」
──PS3的《GT5Prologue》（下稱GT5P）。筆者落場親試，配備無線軚盤、油門腳掣之下，再加埋42"LCD兼Tough到暈的全金屬「車殼」，轉彎搶軚，玩到手都軟！

記者、攝影：陳國輝

《GT5P》開三賽道試玩

10點鐘啱啱開幕，走入PS3攤位，第一眼即見到10部《GT5P》，仲有4位賽車女郎陪你玩，企喺側邊為你打氣!唔使諗，即試！雖然Logitech嘅GT軚盤出名好Feel（但超貴），不過對我嚟講極難操控，尤其轉彎嗰陣，搶呔搶得緊要，感覺似玩街機。至於今作另一賣點——車內視點終於有得試，從車內操作的確有氣氛得多，望見車頭對轉彎、食位等都同真實賽車一樣，有非常大之影響。

■唔識玩驚炒車？唔緊要，隔籬有幾位靚女RacingGirl幫你，教到你識為止。

因序章版關係，現場只得日本鈴鹿等三條賽道，未能一試法國小鎮、澳門格蘭披治等窄路戰，不過試片入面仍見到好多唔同類型嘅Rally賽道，沙、泥表現效果相當不俗，絲毫不遜色於世嘉隻越野王《SegaRally》。可惜，筆者仍未測試到用PS3連線與其他16位對手比賽嗰種對戰樂趣，雖然現場有多達10部機畀大家試玩，但係各有各玩，最多只感受到《GT》系列一直畀玩家嗰種真實感而已。希望正式推出時，能支援埋藍芽耳機交談，令對戰氣氛更上一層樓。

■筆者屬第一批進場傳媒，現場只有十幾人排隊試玩，未算擠迫。

■未正式比賽前，一排靚車列陣，嗰種氣氛加上1080p顯示，夠晒氣勢！

■轉彎搶呔的感覺，好似真係揸緊車咁。

■採用車廂內主觀鏡，可見環境小，略嫌困難。

■揀好10款跑車後，可以選擇以自動波或棍波駕駛。

推出日期：10月20日免費下載試玩版；
12月13日正式推出光碟版及完全版下載

震掣回歸

SCE終於搞掂震動手掣專利權，喺今年TGS正式宣布震掣回歸！不單止未出街大作如《MGS4》、《真．三國無雙5》、《Biohazard5》等可以震餐飽，連PS3舊Game都可透過下載更新檔方式提供震動功能，此舉對機迷嚟講實在係一大喜訊！

PSP都可接收數碼廣播

香港08年全面推行數碼廣播（DigitalTV），不過人哋㗎仔已經玩到手提機都有得睇。日本於同日熱辣推出嘅PSP周邊接收器，SONY就喺現場做咗Demo，睇數碼廣播真係好靚好清。可惜制式為日本用嘅ISDB-T，香港未能用到，希望日後SCEH返到港時能加入對應制式。

■此TVTurner型號為PSP-S3310，日圓售價為6,980（約$490港幣），即日發售。

■用4.3"芒睇都尚算舒服，最難得唔窒格。

■外置天線的位置可以調校，不過香港就唔啱用。約港幣$470（暫只有日本ISDB-T制式）

首款光槍《TimeCrisis4》

講到PS3硬件，除咗無線軚盤，嚟緊11月仲有玩槍戰的《TimeCrisis4》！今次，BANDAINAMCO特別只為PS3推出街機移植版，查實畫面、音響方面都同AC冇分別。重點一提係，新出嘅手槍唔再齋係單手用，玩家可一邊以右手拎起支槍瞄準目標，左手仲可操控槍柄上的方向掣。香港、歐美等地區，將推出橙色版手槍，但只有日本地區會推出黑色版，搭埋現場個42"高清電視，玩得勁爽！