有咩車快得過法拉利F430，或者「波子」保時捷911TARGA4S？答案係電車，八方講你可能唔信，但旅發局主席田北俊講，就一定要信，因為佢真係有呢兩架車，但就話成日搭電車，仲話「快過自己揸車」。田少噚日仲化身「電車男」，帶嚟香港拍飲食節目嘅DiscoveryChannel去食嘢，之後遊埋電車河，宣傳香港。
田少咁富貴，八方初時仲以為佢第一次搭電車，點知田少氣定神閒咁講：「我成日搭㗎，快過自己揸車！」電車快得過跑車？佢解畫：「因為我都係來往金鐘、灣仔、中環，搭得嗰兩、三個站嘛，梗快過啦。」不過，此「電車男」不同彼「電車男」，田少呢位電車男西裝筆挺，30幾度汗都唔多滴，因為佢唔使同人迫，坐嘅係「私人租用」電車，仲可以飛站，由跑馬地殺落中環，十幾分鐘搞掂。
澳門旅遊業殺到埋身，身為旅發局主席嘅田少梗係要紆尊降貴，拋個身出嚟粉墨登場，晨咁早8點幾，就陪節目主持人Zien去中環翠華食早餐，跟手去埋鏞記食燒鵝。吓！唔係話暫時冇燒鵝嘅咩？哦，原來鏞記老闆特登留起兩隻，畀田少做騷。
雖然潮流興放下身段，但田少始終係田少，佢食燒鵝時，先撕咗層皮同肥膏先食，好滋陰，田少仲施施然咁話：「我怕肥嘛。」之後Zien望住田少條腰，頻頻話佢fit。隊crew之後去跑馬地皇府，係田少推介嘅：「我最鍾意食呢度嘅叉燒飯，30幾蚊好抵。」八方喺公司飯堂食嘅叉燒飯，十幾蚊咋。
要洗脫大花筒形象
田少又話，遲啲昂坪360如果開番，應該由馬時亨、錢果豐先試坐：「但你哋唔使擔心，到時一定安全，如果叫埋特首，就100%安全。」爆多樣嘢你知，DiscoveryChannel今日會拍海景，會用私人遊艇，聽講係田少私人借出嚟嘅。
旅發局之前俾人鬧係大花筒，田少似乎想革新形象，佢透露嚟緊會問政府攞少啲錢，減少一啲大型活動，下個月會開會詳細討論。田少唔驚旅客會因而減少，因為會同政府研究放寬旅遊簽證，吸引多啲中東客、俄羅斯客嚟香港，下個月仲會過大海拜會特首何厚鏵等取經咁話。
田少做騷行程
