在電影《朱古力獎門人》裏，查理撼贏四個同樣抽到goldenticket的孩子找到朱古力工廠的秘密。鄧麗欣（Stephy）當年與眾餅女也抽得入娛圈的幸運卡，還率先跑出；以為她會是查理翻版，好姊妹傅穎卻迎頭趕上，與「情敵」鍾欣桐還被搬上銀幕搞gag。朱古力工廠其實苦多於甜，但Stephy就是喜歡，因她最愛黑朱古力。
鄧麗欣愛吃黑朱古力，因為味道夠原始。最近她為M&M'S拍攝新一輯廣告，與MissGreen大做對手戲。Stephy說：「其實黑白朱古力同牛奶朱古力我都鍾意，最憎酒心嗰隻，咬咗一啖就𦧲番出嚟。細個嗰陣我鍾意食甜啲嘅，大個就食黑朱古力，因為更加有朱古力味，但係唔開心嗰陣我都係食甜嗰種。」
男友妙計送鏈
問到最難忘收過甚麼朱古力？Stephy說：「我收過最貴嘅朱古力大約係幾百蚊，朋友送嘅，係純朱古力，得兩三粒，但包裝好靚，好似花籃咁。試過舊男朋友送一個袋畀我，裏面塞滿朱古力，摷到最底係一條頸鏈，真係好難忘。」
黑朱古力外表吸引但味苦，像娛圈的壓力，不是人人受得來。Stephy將於下月與緋聞情敵鍾欣桐（阿嬌）合拍新片，這個組合擺明賣gimmick，旁人期待「睇好戲」，Stephy卻好整以暇：「古仔係講發生喺校園裏面嘅戀愛故事，我同佢係同學，大家嘅戀愛對象都唔同，唔係爭男仔。」緋聞情敵碰頭，也不一定有你無我：「拍戲唔係同呢個就係同嗰個合作，不過我都想同佢（鍾欣桐）多啲溝通，就算搵我哋三個（Stephy+鍾欣桐+方力申）合作都得，其實搵邊個都可以有gimmick，最緊要角色啱。」
盼年底開個唱
講完情敵再講好姊妹，有報道指前餅女傅穎近期轉形象追趕Stephy，還獲公司力捧，更有指姊妹反目。Stephy說：「我同佢唔使比較，大家歌路唔同，支筆喺記者手上，點作都得。佢（傅穎）有佢自己嘅路，我有我自己嘅路，總之我會繼續作歌，目標係年底出碟同開演唱會。」目標明確是非等閒事，才23歲的Stephy，果然吃得苦。
採訪：吳佩思 攝影：陳俊強
服裝：MarcJacob、agnesb.
場地：Gossip51
髮型：VincePangofILColpo
