港股前日升咗成千點，昨日冇出現調整，恒指仲上過去25773，差少少就到25800，收市嘅升幅收窄咗啲，但係仲企穩喺25700樓上，個市咁硬淨，唞唞氣可以上試26000關。
花旗股市繼續用減息嘅消息炒上，個市繼續升，前晚花旗仲宣佈畀房利美同房地美兩間半官方嘅按揭公司做大啲個Portfolio，等信貸危機可以紓緩啲，花旗政府同聯儲局連續兩日落咁重嘅藥，睇嚟呢次花旗染上嘅肯定係大病，呢劑藥如果都救唔番個市，真係唔知仲可以出邊招。
國內股市繼續發揮強者本色，繼續推上，上海A股指數已經上到5741，睇嚟好快又可以試6000點，H股有祖國做後盾，梗係唔失禮，H指升咗成300點收市，跟住點，唔使諗咁多，繼續睇好。
中石化C輪5869：中石化（386）昨收8.73元，股價喺條50日線足足橫行咗成個月，前日跟個市炒上，成交好大，但以陀螺收市，反映市場仲有啲猶豫，不過，昨日終於向上突破，技術上會先試9.30元，破位睇10元，可以買啲中石化C輪5869，昨收1.15元，槓桿率7.6倍（有效4.5倍），對冲值0.6，正股升上10元，5869應該喺2元樓上，正股跌穿8.30元止蝕。