新晉混血模特兒JocelynLuko和MandyLieu近日在模界彈出，來港立足不久已人氣爆燈，與LisaS.同期的AnaR.與Rosemary亦相繼靠緋聞上位，但一直默默耕耘的LisaS.，新聞卻不多，直至近期被本報踢爆曾與金像影帝艾德烈邦廸（AdrienBrody）相戀兩年，之後她又自爆父親是賭場總裁，令她人氣急升。雖然LisaS.有富家女背景，但她接受本報獨家訪問時透露，當年在美國和歐洲只不過是一個普通模特兒，捱了多年，從沒有開口問家人要錢，在意大利更要做酒保幫補生計，不過來港七年間密密接jobs，不單止賺到可觀的金錢，更找到真愛吳彥祖（Daniel），獲幸運之神眷顧，成為了真正的大贏家。
撰文：顏英儀
攝影：ChanShunChing
服裝：PauleKa
場地提供：RACKS
事業--"Ijustgotlucky!"
出生於法國蒙地卡羅的LisaS.，自小父母離異，六個月大就隨母親到美國定居，繼父是賭城拉斯維加斯賭場凱薩皇宮（CaesarsPalace）的總裁GarySelesner，小時候由於母親工作需要，經常要帶客人到世界不同地方的賭場，所以Lisa很多時由代母照顧，只有放暑假才會跟隨母親出國四處去，自小有很多機會去不同的resorts玩，雖然父母均從事賭業，但Lisa卻對賭博興趣不大，「我覺得賭錢只有50%機會贏，你控制唔到；人生就好似賭博一樣，但係你有控制權，我只係十分幸運咁選擇咗做model作為我嘅工作，Ijustgotlucky，Iwonthegame（我只是走運，贏了這場遊戲），如果我當初沒有選擇呢份工作，我諗我𠵱家會成為騎馬教練或記者。」
馬術比賽改寫人生
擁有天賦模特兒身形的LisaS，其實小時候是一名肥妹仔，她說：「我出世時成個巨B咁，面圓圓，好可愛，完全同𠵱家瘦削身形係兩回事。不過到咗14歲，就係我人生最大嘅轉捩點，當年住喺新澤西州，參加咗馬術比賽，有個auntie幫我影相，仲將我嘅照片寄到紐約嘅模特兒公司，之後我同媽咪到紐約面試，面試成功之後，就決定離開家人去紐約發展。但我媽咪一定要我工作之餘，最低限度完成中學程度。」
愛情--「開心過中jackpot」
最近改了中文名雷珊的LisaS.，野心勃勃地希望藉此打入擁有13億人口的中國市場。來港七年，LisaS.剛拿了香港永久居民身份證，成為真正的香港人，更把香港當成家，因為她的事業與愛情都植根這片土地。
Lisa直言由朝到晚不停開工，都是為了賺錢，退休後到南非享受人生，但她在港不但搵到錢，更找到愛情，與吳彥祖拍拖四年半，感情十分穩定，她說：「好多人視香港為賺快錢的好地方，搵夠就走，起初我都一樣，由歐洲轉去新加坡工作，兩個月間雖然日日開工，不過最後收到張支票只係得好少錢，少到喊咗出來，好失望打算轉行，agency建議我去香港試吓，2000年來到之後，就不停接jobs，由當初諗住留三個月，到𠵱家已經七年有多，除咗賺到可觀嘅收入之外仲有名氣，亦識咗Daniel，我覺得自己非常幸運，開心過中咗jackpot。」
過去--好友自殺剃頭悼念
一個人獨自在紐約工作和讀書，在沒有父母管束之下，Lisa常與朋友晚晚clubbing，變得十分反叛，回想當年，Lisa說：「我每晚都同朋友clubbing，十足crazylife，沒有諗將來，直至20歲時有一位染上毒癮嘅好朋友自殺，我先至開始覺悟，自己只係活在夢幻之中，所以決定離開紐約，去咗歐洲發展。而我一班朋友為咗紀念嗰位自殺嘅好朋友，大家都紋咗一個飛鳥圖案紋身喺右手手臂上，當時我好似BritneySpears咁將頭髮剃晒，嗰陣時係我人生之中嘅最低潮。」
展望--轉戰內地做女強人
出道多年的LisaS.，已學懂人生的道理，雖然家中富有，但Lisa寧願靠自己，更訂下不少目標，除了努力工作，更開始學做生意，「我發覺香港嘅market太細，我將來會主攻國內市場，之前亦同國內Olay簽咗廣告合約，香港嘅市場已經飽和，國內嘅市場先至係我最終目標。我𠵱家努力學普通話，除咗繼續做model之外，今年我又同朋友夾份投資開酒吧，最近仲計劃同朋友做服裝設計生意，希望可以做到好似國際名模ChristyTurlington一樣，成為一位成功嘅model兼女強人。」
人物誌：法國出產
原名：LisaSelesner
中文名：雷珊
出生地：法國蒙地卡羅
出生日期：5月26日
國籍：父親是中、法混血兒，母親是美國猶太混血兒
身高：179cm
三圍：33-23-34
𡃁妹超模 三歲定八十
