秋風起嘅時候講栗子，大家可能諗起街邊嘅炒栗子，但同禽流感又有乜嘢關係呢？今年衞生防護中心嘅禽流感演習，名為「栗子行動」，中心話以前啲行動多數用樹名，好似「楊木」、「柏樹」呀咁，今次改用食物名，栗子呢個名中性啲喎。八方就諗起栗子炆雞好好味，但大陸禽流感搞到啲雞咁貴，有栗子都冇得炆雞啦。
講番呢個演習，有成12個部門250人參加，模擬一個粉嶺兒童院嘅女工，外遊去過禽流感爆發疫區，返港後發燒，政府即刻成立應變中心，禽流感警報升級，啲救護員着晒保護衣送佢入瑪嘉烈傳染病中心，連兒童院都要消毒。個演習好大陣仗㗎，由衞生署署長林秉恩親自督師，食物及衞生局局長周一嶽到應變中心視察。