有本書可以免費睇到人生百態，它名字叫「Facebook」。短短3年未夠，全球潮玩，用戶人數直逼4,000萬。由23歲小伙子MarkZuckerberg創立的社群網站，市值更衝破10億美金。呢股Facebook風暴近月終於殺到香港，個個唔出街，呆對電腦半日不叫厭。究竟Facebook吸引力喺邊度？由Fans逐一話你知！
記者：許維雅
攝影：黃子偉
個案一：Audrey長開facebook
約番老朋友
短短玩了幾個月，已經有166朋友、128個Application玩意的Audrey，任職Marketing，自言每日對住部電腦都會長開Facebook，就好似MSN一樣，着迷程度爆燈。「好好玩！唔同Friendster咁單向，Facebook好Interactive，可以同朋友保持聯絡之外，仲有更多溝通。我得閒就送啲嘢食、飲品畀朋友，等大家開心吓。」Audrey最欣賞PhotoTag，每去完一些活動，都會Upload相片同朋友討論，已上載超過500幅。「用ActiveXUpload相好快，好方便。有時見到舊相，好耐冇見嘅朋友會即刻一齊講吓、笑吓，真係好開心！好多時因為咁，大家會約番出嚟食飯再傾，聯繫番好多朋友。」
個案二：全職媽媽May
參加小組討論交流
由英國朋友透過Email邀請，玩了3個月的May，就覺得Facebook有好多Application好有用。「Facebook可以搵番好耐冇見嘅朋友，大家有番聯絡固然係好。但最好嘅地方係，佢有好多Application好有用，好似BookTag可以參考吓朋友推介嘅新書同音樂，同埋佢嘅Groups可以方便聯繫不同小組嘅人討論。至於其他小玩意就太過幼稚，我好少玩。」
街訪：雙向多嘢玩
阿芬：「多好嘢玩，同朋友多啲分享，交流同溝通多咗好多，冇以前嗰啲只係Upload相咁悶。」
Chris：「我用得最多係Upload短片。最喜歡玩Graffiti同MyRoom，不過有好多Application都睇唔明點用。」
Meeco：「好多外國朋友玩，可能因為佢哋少見面。如果可以好似Friendster咁睇埋邊個睇過你Profile就最好喇！」
明星DJ樂評人齊齊玩
繼之前威廉王子俾人知道玩Facebook之後，好多時會發現明星、DJ、攝影師及樂評人等玩埋一份，好似DJMini、攝影師WingShya和楊淇等等都朋友極多。樂評人袁智聰更大讚感覺神奇：「真係好易聯絡到好耐冇見嘅外國朋友，感覺神奇。同埋好喜歡iLike內同朋友分享新歌，仲可以Send啲歌仔畀朋友，真係幾好玩。的確好易沉迷，不過玩耐咗，就唔會放太多時間落去，只係用作同朋友閒聊幾句嘅工具。」
直選！最受歡迎的小玩意
第一位：多功能Funwall
可以擺放相片、短片，更可以畫圖畫、留言、送幸運曲奇給朋友，集多個功能於一身的Funwall，的確帶給人快樂。
第二位：金魚缸MyAquarium
一人一個屬於自己的金魚缸，可以送條不同種類金魚畀朋友粉飾朋友魚缸，越送得多，越多隱藏金魚款式選擇。
第三位：送花送樹Grow-a-Gift
不少女孩子都喜歡收花，Grow-a-Gift就有不少花可以送畀朋友。同樣道理，越送得多，越有不同古靈精怪的花供選擇，好似刀、骷髏頭和男人花等。
第四位：養寵物FluffyFriend
揀選一隻小動物作為自己寵物，再用錢買食物、買屋畀佢住，由於公仔可愛，所以吸引不少女生飼養。
第五位：畫塗鴉Graffiti
愛畫畫的朋友都迷上Graffiti玩意，任你隨意發揮畫上至靚或者搞笑公仔，𠱁朋友開心十分有用。