今年書展有幾本書幾受歡迎，其中由有「𡃁仔教授」之稱嘅中大亞太研究所助教沈旭輝寫嘅《國際政治夢工場》由戲入政，用電影分析國際大事，得到唔少人賞識，白鴿黨嘅張文光都係粉絲之一。佢唔單止向八方猛讚呢本書好睇，原來前日佢仲當面向煲呔推介過，分分鐘帶挈沈旭輝做官都唔定。
話說張文前日應邀去禮賓府同煲呔食飯，俾煲呔睇到佢書不離手，即刻八八卦卦問佢咩書嚟嘅。好嘢唔怕大家分享，張文即刻喺煲呔面前豎晒手指公，大讚呢個未夠30歲就完成耶魯學士課程、兼且讀埋牛津博士學位嘅後生仔犀利，寫出一本有料又好睇嘅大作。
年輕才俊啱佢胃口
眾所周知煲呔幾鍾意年輕才俊㗎啦，尤其佢仲要搞啲乜鬼副局長同局長助理，呢類後生叻仔梗係啱晒佢口胃。
據聞當時煲呔都即時拿起支筆，喺自己本筆記簿上寫上沈旭輝個大名，睇怕日後都有運行。
其實早前煲呔委任一班新血入古物諮詢委員會時，就已經包括身為三十會成員嘅沈旭輝在內。唔通煲呔年紀大，忘記自己一早已經慧眼識英雄？