積架已經好紳士，而XJ系列仲要係積架嘅旗艦車，咁咪仲貴氣？唔計價錢，XJ流露嘅氣質同樣高貴，不過想襯起3.0入門版，亦不一定要淑女，中國娃娃同樣嬌俏得起，好似Jaguar08款XJ6行政級長陣版咁，小改後紳士不再古板木獨，多咗幾分神氣同活力，襯起嬌滴滴中國娃娃順眼自然，一啲都唔突兀。
記者：梁美甜
攝影：梁細權
模特兒：Peggie
08款小改潮、英、帥
積架XJ系列嘅招牌之所以咁響，全因採用咗又硬又輕嘅鋁金屬車身，就算車身望落巨型又大嚿，但揸起嚟一啲都唔笨拙，好輕巧靈活。08年款小改版繼承鋁金屬車身輕巧優點，小改位大多集中喺外觀上，替XJ63.0Executive長陣版加添不少活力。
招牌Logo大變身
叫得小改，全車賣相當然唔會有太大變動，最大改變算係車頭設計；上一款嘅豹頭Logo係全金屬立體豹樣，擺喺車頭前端，而08新款就改用黑底銀豹設計，豹頭依然半立體，再下放至鬼面罩，加埋大大個Jaguar字樣，保留經典之餘亦可加添貴氣。
加完燈再加風口位
新款車頭比上一款多咗一個鼻罩之外，車側多咗兩個刻有Jaguar標誌嘅風口位，令成部車加添幾份跑味。小改款更喺側鏡加設指揮燈同車頭霧燈，車頂尾端見流線型嘅衞星導航，整體配置令新款XJ時款兼活力精明得多。
內櫳寬敞FootRoom大
新版修改雖然集中在外觀上，但內櫳配置才最得人歡心，事關坐過上一款XJ63.0Executive長陣版嘅人都知，後座係就係幾寬敞，但係對腳就一定伸唔到入前座座椅下面，因為被隔墊擋住，令對腳有壓迫感。08款就收起前座座椅下隔墊，增加FootRoom，就算係龍舟腳可以坐飛機咁伸得入，伸展位多咗自然舒服得多。
Profile
引擎：2,967c.c.V6
馬力：240hp/6,800rpm
扭力：300Nm/4,100rpm
傳動：6前速自動波
查詢：積架汽車（25200989）
