早喺Wii宣佈降臨世上嗰刻起，根據成支雷射劍嘅遙控手掣設計，筆者就估死佢會推出大量主觀視點劈友遊戲，起碼至少有跟機頭水嘅《RedSteel》同抄足玩具版「劍神」嘅《DQSword》。嚟緊仲有提早抵港嘅呢隻「體感戰無」，其實絕大部份要素都冇乜改動，只係變成要玩家起勢怒劈，但對於班老任支持者嚟講，今次點都叫首趟接觸到呢個系列，講到尾點都要科水支持吓嘅。
文：陳福榮
揸住遙控猛殺敵
如果有人話《戰國無雙KATANA》係同PS2《戰國無雙2》一樣，咁佢肯定係搵緊你笨，至少喺操作上兩者存在極明顯嘅分野。皆因視點變成主觀化冇得睇住背脊，玩盡「進攻係最佳防守」概念，唔想俾人陰背偷襲而死就要以最快速度，幫戰場上所有敵人埋單。好容易理解到隻Game係用左手揸嘅Nunchuk嚟郁，右手嘅遙控器就擔任咗一般攻擊、儲氣攻擊以至「無雙亂舞」嘅輸入渠道，假如眼前彈出嚟嘅雜卒有過百人，咁嘅話真係一刀一隻都斬到手軟，同以往只須不停按圓圈交叉掣簡直係兩碼子事。
主觀視點利弊皆存
出得喺Wii嘅體感Game，採用主觀視點都係正常不過嘅事，因為就算唔係百分百主觀亦好，極其量咪俾個背脊你睇，兩者分別着實不大。變咗「冇面目見人」，大家要重新適應武器嘅有效距離，始終一把刀同一支矛隊到幾長都好唔同啦！當然大家都唔使太愁，因為電腦會因應敵人站立距離而作出相應顯示，打得到同打唔到係會有唔同嘅提醒標記，當然唔使問阿貴長矛點都打得遠過短刀啦。唔單止咁，其實系統係容許玩家同時裝備一長一短嘅武器，亦即係話可以既有利刀又有弓箭，以應付企喺好遠想偷襲嘅麻煩友，令到攻略過程產生較多變化。然而Wii始終性能上唔係太強，喺啲重要地方如騎馬仔嗰陣，Zoomin到勁近嘅馬頭時所有穿崩位會即時現形，睇見都不禁教人講句：「畫面靚番少少就好咯！」
照樣有得儲武器
今集《無雙》可以俾玩家揀嚟用嘅武器，話多唔多話少唔少，因為佢以近遠攻擊距離劃分為總共8種，例如刀劍係近身武器而槍箭則係遠程專用，再者每種都設有4個不同等級，換言之即係有32款俾大家慢慢去儲。可能有人會話，以前係逐個角色咁去死儲爛儲第五武器，加上部份隱藏武將嘅出現條件都幾苛刻，係咪即係話呢隻Wii版《無雙》耐玩性唔多高？其實佢嗰個新增設嘅「無雙演武」模式都算幾有變化，事關講述玩家要由隸屬織田信長嘅小兵做起，每關逐一擊破敵軍嚟換取升官機會，裏頭又有唔同嘅劇情分支，咁玩起嚟就會更有代入感，更有原創味道。
模式眾多好襟玩
嚴格嚟講《無雙》從來都冇出現過喺Wii同GC身上，令到呢隻《KATANA》啱晒老任Fans合尺，一次過滿足咁多年冇得掂三國群雄或戰國猛將嘅慾望。但對於老牌《無雙》Fans，齋出狂劈版似乎意義不大，所以開發小組𢱑爆頭都要搞啲新點子，否則對各位唔住！而佢設有嘅「一騎當千」和「對戰」都幾冇新意，反之鬥快衝到指定目的地兼鬥唔俾人擊中嘅「絕體絕命」就勁搞嘢，因為遊戲本身原意係盡量享受瞬殺大量敵人嘅快感，如果唔打交只係鬥跑得快就似乎幾無謂。
機種：Wii
廠商：KOEI
類型：ACT
人數：1-2人
售價：$368
推出日期：9月20日
查詢：I-Gamer（27253338）