股神李兆基賺錢好容易,短短1個月旗下嘅兆基財經炒股就賺咗一二百億銀,所以佢話以後捐錢會鬆手啲,捐多一兩倍。佢噚日就捐咗5000萬銀畀香港公開大學。大學以「李兆基商業管理學院」答謝,四叔開心之餘醒咗散戶一句──恒指見兩萬八。
佢又話最近兩年捐咗4億銀畀內地,用嚟培訓100萬名農民學番門手藝,同埋幫佢哋喺大城市搵工;以一家三口計,有成300多萬人受惠;佢決定再做多一次,希望可以幫到700幾萬人。
有行家追問佢會唔會學股神畢菲特咁,捐九成身家出嚟做善事,四叔話一年都捐成幾十億,而且對農戶嚟講,少少錢已經好有效果,其他嘢慢慢講。嗱,學嘢喇,耍太極都未夠高招,再嚟一招亁坤大挪移,佢話𠵱家股市好,政府一年收成300億股票印花稅,應該使多啲喺公益教育。