利記於周二歐聯1:1打和波圖未能旗開得勝，中場「壞孩子」賓納58分鐘粗野攔截領紅，成為全英公敵；偏偏領隊賓尼廸斯仲幫住佢：「佢的確犯錯，相信佢會從中學習，件事對佢將來更有利！」呢對賓佬仲唔係有景轟！
小白臉留鬚變麻甩
講真，賓帥使唔使偏袒成咁啊？仲離譜過「志雲大師」硬捧小崔！我求大俠就諗到賓帥獨愛賓仔嘅3個理由，大家睇吓成唔成立。首先，賓帥今夏突然改變形象，小白臉學人留鬍鬚，成個「斷背麻甩佬」咁，唔通……。
查實，賓帥老婆係律師出身，口才了得，賓帥喺屋企地位未必高，加上呢隻「老虎乸」每逢球隊贏波都出來搶風頭；日子耐咗，賓帥咪將精力擺晒落賓納度囉！仲有，賓帥上有阿哥下有妹妹，夾喺中間嘅佢實成日被父母鬧：「學吓你阿哥啦！……讓吓個阿妹啦！」久而久之，賓帥變得反叛，今日咪對賓仔格外開恩囉！
對球員心理感興趣
最後，賓帥82年喺馬德里大學攞到心理學學位，對球員心理特別感興趣；以賓仔呢類早成名早墮落，炒車、打交樣樣皆精嘅「爛仔」，賓帥緊係特別關照啦！於是佢化身科學博士，當賓納係白老鼠咁研究，希望有朝一日發明隻藥，等問題球員食完變乖乖仔，分分鐘諾貝爾獎有得佢攞。
嗱！上述純粹個人猜測，並無任何嘲笑成份；如有雷同，純屬巧合。版權所有，抄襲必究！