沙田陳太屋企嘅老人家睇咗「某報」幾十年，呢幾年「某報」改到面目全非，老人家仍然睇「某報」，但凡邊度有粵劇大戲，老人家一定知道，因為啲大戲廣告梗係在「某報」刊登嘅。但呢個禮拜，老人家好唔高興，因為屋企冇咗份「某報」也。沙田陳太特別為咗咁而返屋企問清楚，原來每朝派報紙嘅報販老早通知，送上一份通告：「因『某報』每日遲到，影響派紙時間，為免延誤派報工作，以後不再派『某報』上門（大意如此，非原文）。」
沙田陳太問左丁山：「點解『某報』會遲到沙田㗎？」左丁山點知啫，凡報紙出版，有早有遲，譬如《蘋果》，老早（大概凌晨三時前），已有早紙喺旺角報攤出現，與其他報紙爭市場，但在早上三點，一份財經報好似仲未上機印刷㖭。報紙印好後，需靠發行公司合作，全力配合，送往各區，如果報紙印得遲，發行送得慢，咁就在新界地區好耐都未有得賣。
老人家冇「某報」睇，怏怏不樂，睇完一早送到嘅《蘋果》，仲係若有所失，幾十年習慣係難改變一啲。講起報紙，一位樹仁大學新聞系學生傳來電郵，抗議上星期左丁山話新聞系學生唔睇報紙。呢位樹仁學生封電郵寫得情文並茂，十分流暢，不愧係新聞系學生。不過咁，你自己睇報紙啫，不妨周圍問吓啲大學同學睇唔睇，此外，如果多數同學都係在網上睇《蘋果》，《蘋果》豈非賣少好多份？影響實銷數量㗎。
小記者G等一班新聞系同學都在傳媒工作，想話返母校樹仁重讀一年，取得學位。記者G埋怨話：「學校好似通知近一兩年畢業生可以返去重讀，對我哋呢啲七、八年前畢業嘅，冇乜熱情。」讀番一年，可以攞番個degree，值得吖，不過記者G話：「申請人數多，幾百人申請重讀，邊有咁多位呀，睇怕希望都係好細。」
寫到呢度，鄭大班來電話港島英基中學發起月餅運動計劃，希望有月餅在中秋節前送到月餅畀啲underprivileged人士，各階層人士共享佳節。各位預知有月餅食唔完嘅，請於九月二十五日前將月餅送往中環政府合署西座420室鄭議員辦事處或富利堡汽車行柯士甸道陳列室。