「我最愛的味道，用脷舔多兩舔……」晚晚見到哈林同嘉賓玩「聞」、「嗒」等遊戲，唔鹹唔淡廣東話可愛得嚟遊戲有趣，比起之前毫無「進步」的節目，真係一看已分「高下」。見哈林玩得咁開心，又臨近中秋，決定找來唔怕曬的HotCha三妹，有樣學樣，嚟個味分高下之月餅篇，要知道組合名HotCha意即狂熱，即Check她們對月餅的狂熱度，邊玩邊嗒，實行以月餅分高下！
記者：馮冠芝
攝影：伍慶泉、林栢鈞
HotChaHairandMakeUp：[email protected]、X@ModMakeUp
賽前分析還是最愛蓮蓉月
HotCha唔怕曬，但就同其他女仔一樣驚肥，怕食太甜，但一到中秋就份外開心，「因可名正言順咁食！」Crystal開心道。𠵱家月餅越出越多，佢哋會唔會越食越多？原來Crystal與Winkie皆好傳統月餅，尤其Winkie竟到最近才首嚐冰皮月餅！當記者晒冷多款月餅時，她們都不約而同選外表傳統但口味激新的香辣牛肉月餅為至愛「味之天使」！
Winkie自知「月餅經驗少」，採訪這天又帶病上陣，味蕾遲頓可以理解，故她醒目地自動化身美女版哈林，做司儀加評判！好，就由Crystal單挑Regen。睇牌面，只好傳統蓮蓉月的Crystal有啲蝕章，反而最細粒的Regen就咩都食。「Regen成隻曱甴咁！」Crystal先出口術。遊戲分3回，每回勝出者得一個燈籠，廢話少說，即來味分高下！
激戰3回 CrystalVSRegen
第1回：「嗒」月餅 狂試12味
遊戲規則
桌上有12款月餅，亦即本文介紹過的款式，新口味、傳統型、禮盒裝，真係樣樣有。兩方人馬便用超長筷子夾月餅予另一蒙眼選手試吃，1分鐘內猜中越多味道者勝出。
遊戲開始
Crystal蒙眼，氣勢如虹先上陣！蜂蜜柚子味、茉莉桂花味……吓？統統是綠豆蓉！主持Winkie也忍不住說：「大部份冰皮月餅都有綠豆蓉啦！」Crystal唔鍾意食生果，但杏仁甘粟味月餅就估係芒果、咖啡味又估係生果味！最後估中紅豆味冰皮及莫加味冰皮月餅，果然與生果無關！
輪到Regen，既被稱「食物垃圾桶」，一開始便自信滿滿！遇上咖啡味冰皮便神氣道：「這個不用食，一聞就知係咖啡！」Crystal深知她實力強，便夾了近似的莫加味給她！Regen一亂：「點解跟剛才的差不多？」但還是猜中，惜後來將地瓜豆豆講成蛋黃、紅豆味說成西瓜，結果……
第2回：「聞」月餅 實行煮死對手
遊戲規則
參賽者以月餅及食材煮餸，另一人蒙眼，靠嗅覺找出那碟由月餅煮成。
遊戲開始
贏了第一回，Regen得勢不饒人，決定煮鑊甘嘅畀Crystal聞。先落蛋後落伍仁叉燒月餅，更將月餅壓碎，煮出與叉燒粒有8成似的菜式！9秒9再完成正常叉燒炒蛋。Crystal味覺麻麻，嗅覺卻不差！雖然她一時說叉燒炒蛋那碟有牛肉味，即被其他隊員大罵：「儍瓜！叉燒炒蛋點會有牛肉味？」但最後還是能正確指出叉燒月餅炒蛋是那一碟。
新出香辣牛肉月餅，真材實料，食它如食牛柳。Crystal於是煮個菜心炒牛肉月餅回敬Regen。只是牛肉月餅溶成一「擗」，Crystal甚「呢Hea」！之後煮番菜心炒牛肉，Crystal有板有眼。完成兩者，Regen唔使翻聞，立刻講中邊碟係月餅！當大家對她敬佩不已，她口快快露底：「煮第二碟時攝記哥哥話：『都無醃到，炒出嚟都唔好食！』只有牛肉才需醃！」HotCha另兩女以怨恨眼光射向攝記……最後主持Winkie定奪，Regen有偷雞之嫌，所以今回判Crystal勝！
最終回：「咬」月餅 一啖定生死
遊戲規則
參賽者一啖咬月餅，咬出嚟的月餅以最接近60g為勝！
遊戲開始
Crystal自箍牙後，食太硬的東西會牙痛，月餅軟腍，她差點不願吐出來磅，想大口吞下。Crystal一啖咬下50g！相距不遠！最後鹿死誰手，就要看Regen那一口了……
誰是月餅王者，且看Regen這一口……55g，僅以5g取勝！結果，嗒、咬兩回都是Regen勝。
Regen以2:1撼低Crystal！Winkie（中）主持了簡單而唔需要隆重的燈籠頒獎禮！
香辣牛肉味$98/6個裝（b）
外表傳統內裏Open，激新牛肉味月餅，以牛肉絲配白蓮蓉，加上辣椒及花椒等調味，外皮微甜內裏惹味辛香。正中HotCha三女愛傳統但又貪新口味的下懷。
冷/暖食冰燒月$122/6個裝（a）
先烘焗再冷凍，可冷食或當傳統月餅咁食。以抹茶紅豆包裹地瓜茸，餡內有餡，味道豐富。另有栗子草莓、綠豆蛋黃碎共3種口味。
養顏冰皮官燕月餅$256/6個裝（c）
女士愛食月餅又驚肥，燕窩月餅配上桂花、香芒、杏汁等6種口味，清香又養顏，越食越靚，教女士大快朵頤。
一口冰皮$105/15個裝（d）
可愛的白兔仔月餅盒，拆開後是五顏六色的笑臉迷你月餅，未食已喜上心頭！炭燒杏仁甘栗香濃、蜂蜜柚子清香等5種口味，一口一個，試晒都唔覺滯。
打孖冰皮$26/2個裝（e）
冰皮月餅多口味，兩個兩個咁買剛剛好，試了杏桃茉莉綠荳蓉及蛋黃綠荳蓉，前者花香化膩，齒頰留香，後者蛋香味濃，美味非常。
清新伍仁叉燒月餅$138/4個裝（f）
蜜汁叉燒加上果仁及健康的亁果，簡直是集煙韌及脆卜卜於一身，伍仁有糖冬瓜、欖仁，出奇地健康而不油膩！
「七星伴月」雪糕月餅$438（g）
一盒8款雪糕口味，最特別係士多啤梨芝士蛋糕味，中間是月亮呍呢拿味，創新地以芒果雪菓扮蛋黃。
低糖雙黃白蓮蓉$176.5/4個裝（e）
以麥芽糖代替傳統砂糖，甜味淡了亦減了膩，怕月餅膩又想應節的人最啱。
趣致KieKie造型$49/2個裝連相架（e）
外形可愛Size細細個的兔仔月餅，必能吸引小朋友胃口，有綠茶蓮蓉及水瑩豆沙味。
傳統雙黃白蓮蓉$163.5/4個裝（e）
蛋黃香甜蓮蓉滑，傳統的口味＋年復年的中秋回憶＝無價！
豆品迷你家族$88/6個裝（a）
又一款逗小孩之作，豆豆一家三口各種口味，蛋黃碎、地瓜、抹茶紅豆任君選擇。
典型禮盒包無衰$188/4個裝（a）
兩個雙黃白蓮蓉加兩個金華火腿月餅，最欣賞此禮盒附上特級舊普洱茶葉，消滯化膩，送禮最啱。
（a）東海堂 27391328
（b）譚魚頭火鍋旺角分店 23813999
（c）大班麫包西餅 23513222
（d）聖安娜餅屋 28703791
（e）榮華 24779947
（f）蛋撻王 23044801
（g）Haagen-Dazs 26289330
*部份價錢或因不同優惠而有差異