港股又創新高兼成交爆燈，股票經紀收入唔使講一定「犀飛利」，不過經紀賺到錢之餘亦不忘做吓善事。華華噚日去咗證券經紀業協會新一屆換班飯局，收到佢哋籌備為旗下會員舉辦義工服務，例如賣旗、去老人院探訪。
席間講開資金自由行，有個中資證券行代表暗示，港股近排成交雖然日日過千億，但相比大陸郁吓都3000億人仔，重差成條街，建議港交所（388）取消即時報價徵費，為港股直通車開方便之門，順便谷起成交，拉上補下隨時有得賺。
家陣港交所提供嘅即時報價，係獨市生意，每次盛惠5仙，同國際豁免收費嘅大潮流背道而馳。𠵱家上海同深圳兩家交易所，已經向股民提供免費即時報價；日本、南韓甚至紐約雖然有徵費，但比港交所平一截，一直標榜國際金融中心嘅香港，喺呢方面真係要檢討吓。