里昂投資論壇差唔多年年都喺君悅度搞，記憶中，呢間酒店嘅保安，經常同傳媒發生唔愉快事件。好似噚日咁，華華一早去到會場，同滙控（005）主席葛霖打招呼，佢好客氣咁話，等演講同午餐環節完咗，先有時間傾兩句。咁華華就百分百絕對配合大會吩咐，差唔多時間就踎喺記者區等葛大班。
點知記者欄，原來淨係要嚟圈住啲華人記者。發問時間，兩名英報老外記者，大搖大擺咁企喺葛霖隔籬，因為其他人等被圈在欄內，所以佢哋可以好有特權咁，掹住葛大班問多幾條獨家問題。
咁嘅情況，華人老記梗係即時要求保安，請兩名老外入番記者區，點知啲保安好似淨係識聽英文，借咗聾耳陳隻耳。嘩，香港都回歸咗祖國十周年，今時今日，仲玩殖民地式洋人特權，認真離譜。