徐克同賢內助施南生，夫婦多年來合作無間，一個係導演，一個就協助老公處理電影工作室嘅事務。不過徐克兩公婆近日頻傳感情有問題，雖然係咁，佢哋早嗰排又一齊出席好友鍾楚紅老公朱家鼎嘅追思儀式。
馮仁昭前日打電話搵施南生求證，佢好冷靜咁否認話：「我哋夫婦正常。」馮仁昭打蛇隨棍上，再問佢哋婚姻生活係咪幸福？施南生就話：「一般正常。」佢呢個答案都幾妙，究竟何謂「一般正常」，就真係得佢兩公婆先至知喇。
曾傳葉蒨文介入
講番徐克兩公婆嘅舊史，施南生同前特首董建華表妹張培薇係瑪利諾嘅同學兼死黨，徐克就係張培薇老友，機緣巧合之下，張培薇做咗佢哋嘅媒人，撮合咗呢段姻緣。有指佢哋1981年喺美國結婚，但實質佢哋冇註冊，只係一直過住同居生活，93年有傳因為葉蒨文同徐克傳緋聞，搞到施南生好唔開心，不過施南生同徐克終於喺96年正式註冊，令施南生得到徐太嘅名份。