今年本地娛樂圈喜事重重，女星生BB的喜訊接踵而來，繼張栢芝、徐子淇、謝安琪和湯寶如等相繼榮升人母後，07年結束前，尚有不少女星等做媽咪。昨天圈中又傳喜訊，37歲的無綫前花旦陳慧珊日前已順利為丈夫鍾家鴻誕下小B女；而早前吳美珩也為富豪老公王華麟誕下BB；至於麥家琪和李克勤太太盧淑儀同樣臨盆在即，下月齊齊踏入預產倒數期；而周嘉玲則為印籍夫婿懷有4個月身孕，預計明年春節後混血BB便會面世。 採訪：比華利、顏英儀、葉雪
-陳慧珊順產母女平安-
陳慧珊和吳美珩這兩位無綫新舊花旦，早前不約而同懷有身孕，不過二人均極之低調，據知前者已於日前誕下趣致女嬰，母女平安；吳美珩也於較早前為億萬丈夫王華麟順利誕下金豬BB。
昨日有可靠消息指，37歲的陳慧珊上周已入院待產，其經理人夫婿鍾家鴻（Mike）寸步不離守在太太身邊，至日前她採取自然分娩誕下小B女，夫婦喜不自勝，據悉陳慧珊生育後身體狀況良好，隨時可出院。
吳美珩玩神秘
其實陳慧珊7年前與任職科大教授的前夫鍾偉明離婚後，去年才與Mike在美國結婚，婚後馬上展開造人計劃，懷孕後向來喜歡小朋友的她更計劃將來再追多個，故她雖然怕痛，但仍堅持自然分娩，實在相當勇敢。
至於吳美珩也十分神秘，已屆35歲的她由於懷孕，至今年5月才終於承認早於01年已跟源富投資創辦人、資產近40億的超級富豪王華麟結婚，並透露預產期為7月。據悉吳美珩早前已順利誕下BB，但其個性低調，知情圈中人寥寥可數。昨日記者曾分別致電吳美珩和陳慧珊夫婦，但三人同聲同氣，均未有接聽電話。
-麥家琪飲魚湯餵人奶-
93年落選港姐麥家琪去年與拍拖4年的大律師男友王國豪註冊結婚，今年初即宣佈有喜，下月便是預產期。早前家琪已向亞視請假安胎，為王家添金豬BB做好準備。首次懷孕的家琪自言心情並不緊張，主要是因為有已為人母的老友袁詠儀（靚靚）教路，傳授湊仔心得。
靚靚傳授貼士
家琪昨日在電話中說：「係呀，我真係唔緊張喎，得閒都會同靚靚通電話，佢會講吓啲貼士畀我聽。」她又透露早前已經照過超聲波，得知腹中塊肉是兒子，她雀躍地說：「BB係囝囝嚟，嬰兒用品我都買得七七八八。」
問到家琪打算自然分娩還是剖腹產子？她說：「同醫生商量好，我準備試吓自己生先，唔得先剖腹。」為了讓BB增加免疫力，家琪計劃產後餵人奶，夫婦二人更已為兒子想好名字，但要保持神秘感，她神秘地說：「中英文名都改好，只可以透露佢英文名係J字頭，老公話要同佢一樣喎。」
體重增加50磅
距離臨盆僅餘一個月的家琪，據知重了接近50磅，問她平日喜歡吃甚麼安胎？她說：「都冇乜好特別，不過我鍾意飲番茄薯仔煲魚湯，貪佢酸酸哋，比較開胃。」估不到家琪的口味竟與剛產下「千億B女」的徐子淇一樣。
-周嘉玲陀印度B暴脹-
前年結婚的周嘉玲也趕上生仔潮，現時懷有4個月身孕，目前仍繼續上班的她昨日接受電話訪問時難掩喜悅之情，說：「第一次陀BB好緊張，覺得好開心又幸福，我同老公都好開心，BB性別就仲未照。」
「盡量自己湊BB」
之前周嘉玲曾說見香港遍地BB都由菲傭湊大，令她考慮過不要生，昨日她說：「我會盡量自己湊BB。」產後會否轉做全職媽咪？她說：「呢樣嘢言之尚早，我𠵱家仲返緊工，初初佗BB時有嘔，不過近期就冇乜事啦，不過𠵱家粗身大勢，就快開鑼嘅米蘭、巴黎時裝節我就唔會去啦。」
問周嘉玲懷孕後肥了多少？她說：「都幾多㗎，不過唔緊要啦，生完先慢慢減囉，最緊要係BB健康，但係暫時對我最大問題係呢9個月唔可以着高踭鞋，我係超級高踭鞋癡嚟，開季又買落好多，𠵱家反而要買過好多平底鞋，我唔着開都覺得好唔習慣，不過如果要出席活動見人我仍然會着番高踭鞋㗎。」
