聯儲局減息半厘，孫柏文大跌眼鏡，加上滙豐重上140以上，佢冇眼睇，所以搵咗我做替工。
其實，我都覺得呢個肥仔好煩，總要在大時大節，有大件事發生，就要行開行埋。不過，今次我都覺得，佢要好好唞吓，整理思緒再出發。
一來，鬍鬚曾入股港交所，的確打亂晒好多人對後市嘅睇法；二來，聯儲局原來真係Dove，即係肥孫嗰個伯南克教訓炒友嘅理論終於被推翻。從今以後，基礎分析要轉營，學政治分析，就好似張無忌學太極，要將之前學咗嘅功夫忘記得一亁二淨。
情況有變要跟住轉
記得大奇迹日之前一晚，即係8月17號凌晨，我同孫柏文睇CNBC，見到美國人個個愁雲慘霧，無晒鬥志，不過，收市前跌幅收窄，個個當堂醒晒。我話︰「使唔使啊？個市唔係升就跌㗎啦！呢班美國人，DJIX仲喺萬三點樓上，咁快就變晒驚弓鳥，心理質素咁差，睇嚟真係就快股災。」結果孫柏文就繼續持有佢隻滙豐Put，世民就揀咗隻港交所Put，仲要喺開市頭五分鐘入平貨。
大奇迹日，下晝兩點半，嗰兩隻輪都幾生性，直頭升到連賺咗錢嘅我哋都有啲心慌。不過，三點半過後，奇迹出現。喂，奇迹喎，又有乜好講先。之後幾日，甚麼資金自由行，我都惟有學炒股有啲心得嘅凱恩斯講句︰「Ifthefactschange,Ichangemymind,sir.Whatwouldyoudo,sir?」反手轉揸港交所，後來無啦啦政府入股，實為老襯撞棍，不過，執到小許也是事實。令人感慨者，原來衝動仲好搵過分析，呢啲符碌錢，又有幾可有得執呢？
觀察正確錯在結論
不過，肥孫始終係後生囉，道氣唔順，走去苦思聯儲局動向，諗住將功補過，殊不知，觀察正確，分析卻差之千里。前日嗰篇疑似偽冒公開市場委員會聲明，估中咗兩樣嘢︰聯儲局認為通脹仍未受控；以及信貸市場情況不佳，房產市場亦不佳。
不過，孫柏文就偏偏覺得聯儲局會唔減息，你話係唔係諗政策市未到家呢？我要強調，佢係「覺得」，唔係「認為」，呢啲就係啲人跟政策市跟得太多，迷失咗嘅表現。
世民相信，不單止肥孫，好多人都會好似佢咁，呢排都好迷失。撥開雲霧，跟住個勢會點發展，明天續談。