好多球員都有怪癖，好似巴西球星卡路士總係出場前一刻先着波衫；而呢期紅到發紫嘅曼城中場米高莊遜，就鍾意剪爛對襪再喺底着多對，結果開季射入兩球，認真威威！
呢位19歲嘅金毛仔話，賽前會進行例行儀式：用鉸剪將波襪腳尖位置剪走，然後着上訓練時着嘅私家波襪，再笠埋對甩頭波襪，「咁樣着就舒服晒！」我求大俠問過前球星阿丘，佢話之前快譯通門將李安納同好易通中鋒李布倫，都鍾意剪爛對襪兼着兩層襪，呢種做法喺英國外援入面都好普遍。
剪襪怪癖助入波？
我求大俠覺得鬼佬日日鋸牛扒，食到腳皮厚骨頭硬，着對新襪踢波腳感肯定差啲；反而亞洲人皮細肉嫩，好似我求大俠咁都唔知幾想着多對襪，咁樣食鞋底餅都唔怕痛嘛！不過點都好，最緊要係米高莊遜話齋：「舒服！」咁就場場波交到貨㗎啦！
好似米高莊遜咁，佢喺8月15日對打比郡就入波，呢球係曼城喺主場8個月以嚟嘅第1球！跟住喺啱啱過咗去嘅禮拜日對阿士東維拉，呢位英格蘭U21國腳再入奠勝球，結束球隊聯賽兩連敗，就咁做咗領隊艾歷臣口中嘅「天才全能新星」喇！
艾帥口中全能新星
呢位米高莊遜係列斯聯球迷，之前分別效力過列斯聯、愛華頓青年軍；06年正式同曼城簽職業球員合約，上季得前領隊皮亞斯提攜聯賽上陣10次，結果今季艾歷臣入主後成為球隊嘅明日之星、英格蘭國家隊未來希望。