「病從口入，禍從口出」，耀才證券近年以低佣低息搶客，仲好似啲輪商咁大賣廣告，幾年間由C組晉身為B組經紀。之不過，同行一直都唔係咁認同佢嘅出位方式，但係都止於言談之間。
最近佢哋一個廣告，標題為「駁腳經紀，俗稱『A/E』，係股票行毒瘤嗎?!」就辣㷫晒所有行家，搞到證券經紀業協會、證券學會、證券商協會、證券及期貨業公會代表，搵議員詹培忠幫手，一齊操去政府討公道。
出位廣告辣㷫行家
話說佢哋一眾人等見咗財經事務及庫務局常任秘書長何鑄明，仲有證監會代表之後，詹議員話，政府已經確認「A/E」（佢哋繹做客戶主任）對證券行業嘅重要性，而且重申冇計劃改變對「A/E」嘅政策。佢仲話：「A/E」全部要同證監會攞牌，如果係毒瘤，即係證監喺度製造毒瘤，危害香港證券業。證監代表又答應佢哋，會睇吓耀才個廣告有冇違反或者牴觸證券及期貨條例或守則。
問番耀才總經理陳啓鋒，佢承認詹議員冇講錯，不過公司唔打算道歉，只係唔再登嗰個廣告。一句講晒，以後賣廣告，賣花讚花香咪算囉。