美國最大玩具製造商美泰（Mattel），早排宣佈回收中國製玩具，理由係含鉛太高。網友wpnj喺美國《FreeRepublic討論區》話：「美泰貪大陸人工平，將玩具生產工序外判畀大陸承包商。所謂平嘢冇好，搞到要回收，自作自受。為免中國製玩具危害美國兒童健康，美國企業唔應該再將生產工作外判到海外。」
dumbblonde講：「美國人應該團結起嚟，杯葛所有喺中國製造產品嘅公司，大陸貨唔單止質素麻麻，仲令美國工廠少咗好多生意，搞到好多人失業。」
遠因：人工高
GailA話：「我諗未來幾個月，越嚟越多中國製產品回收。我已經打電話畀沃爾瑪，話我唔會再買中國製玩具畀我兩個孫，仲要求佢，唔好再入中國製玩具；不過，沃爾瑪冇接納我嘅建議，我好失望。」
californiahillbilly回應：「美國工資高，如果唔喺大陸設廠，好難經營，惟有將工序外判。事實上，沃爾瑪、Target、玩具反斗城等大型店舖，出售嘅玩具，大部份都係中國製造。」
mysterio話：「美國工人成日獅子開大口，希望時薪7、8美金（55至62港銀）；墨西哥工人亦好貪，索取1.47美金（12港銀）；中國工人效率高，只要求25美仙（2港銀），你話，美國老闆會請邊個？」