華華公司個canteen係由大家樂（341）旗下嘅泛亞承包，提到大家樂，就梗係要講吓佢哋嘅一哥豬扒焗飯。可能係大陸通脹，豬肉價係咁升，所以華華去canteen，好多時見到嘅係一哥雞扒飯。噚日華華見到大家樂主席陳裕光，梗係問吓佢：「幾時先有得食正牌一哥豬扒飯?」
節流唔用豬
陳裕光好坦白話：「大陸嘅豬肉批發價，由年頭萬三蚊一噸，到家吓兩萬七蚊一噸，足足升咗成倍。」咁即係點？佢話已經分散採購，盡量喺中國以外，好似去巴西買豬肉，但大陸始終係入貨重地，為咗降低成本，無辦法唔將招牌飯改料，仲話暫時都會咁做。華華擔心呢幾日廣州爆發禽流感，要劏雞殺鴨，咁容乜易……
陳主席仲發出加價預警，佢話今年已經輕輕加咗3至4%，家吓人均消費大約係廿六個半，年尾前仲有機會再加。吓，已經冇至愛豬扒飯，仲要加價！
年尾前再加價
陳裕光計到咁盡，一啲都唔驚fans轉軚，原因係班股東一定撐佢。唔係咩，做上市公司主席咁識計數，幫股東賺唔少錢。一講到水頭充足，陳裕光就笑到見牙唔見眼，「我哋嘅派息比率已經由四成半，增加到六成半；間唔中仲要𢱑爆頭，諗啲『特別』理由出嚟，派吓特別股息，搞咁多嘢，都係散到兩億銀咋！」
華華醒條橋畀你，一於以「飯」代息，派股息之餘派埋正牌嘅一哥豬扒飯，家吓啲豬咁貴，要散錢好容易，又可以乘機省吓招牌，係咪好橋呀！
[email protected]
Parttime賺錢夠買樓
除咗幫公司慳錢，陳裕光本人都好知慳識儉，佢同華華講，當年喺加拿大讀大學時，成績好到攞獎學金，筆錢夠晒學費同埋生活費。
佢仲去做parttime同暑期工𢱑銀，一邊搵一邊儲，到大學畢業個時，筆錢夠佢買人生第一層樓。
除咗慳仲要博
陳裕光話，當年佢都做過好幾份工，最記得就係喺老人院做助護，又喺火車度做過waiter，就係因為做得服務性行業多，所以家吓做快餐店，先至咁好成績！
做parttime做到買樓，唔通人工好高？佢話做waiter得個四加紙一粒鐘；助護好啲，但都係得個八咋，仲未計扣稅。
儲到錢，係因為陳裕光夠勤力，每日放學就去老人院返工，由下晝五點踩到第二朝七八點，佢個刻薄老闆怕佢晚黑偷懶瞓覺，晚晚都放低桶油，叫佢無特別嘢做，就幫手髹牆，真係想「蛇」吓都唔得！呀，唔知家吓佢有冇將呢啲招數，用喺大家樂嘅員工身上呢呵？