近年退出幕前嘅張燊悅，早前已宣佈年底要做楊太，下嫁立法會議員楊孝華兒子楊哲安，呢對準新人鬼咁甜蜜，得閒就食飯拍拖。前晚約9點，待嫁嘅張燊悅獨自一人喺銅鑼灣利園附近出現，一身便服打扮嘅佢長髮及腰，薄施脂粉拎住個手袋行街街，自從退出演藝界，加上有愛情滋潤，張燊悅嘅身形好似波咁吹脹咗。
睇鞋打發時間
張燊悅第一站就先去咗白沙道嘅峰壽司攞籌，然後見門口仲有人要等位，佢就一於唔嘥時間，喺附近行吓鞋店，其間入咗一間店試咗三對高踭鞋，睇佢都好有興趣想買，不過當佢一接到電話，就拿拿臨急步行返去壽司店，原來佢收到男友楊哲安嘅奪命追魂call。
見到男友嚟咗，就算身邊有好多途人，張燊悅都唔理得自己公眾人物嘅身份，好識做咁飛撲埋去同男友咀嘴，雖然要稍為等候，但換來女友嘅香吻，楊哲安立即冧晒，仲頻頻向張燊悅擠眉弄眼扮鬼臉sweet到痹，結果佢哋等咗幾分鐘就有位入去開餐。