Car通:引擎升級直4變V6 <br>Alfa跑款扮旅行

Car通:引擎升級直4變V6 
Alfa跑款扮旅行

幾個月前,Alfa159Sportwagon推出,型爆跑樣配流線斯文車身令我驚為天人。扮晒車手踩行油,Selespeed加減波箱帶嚟嘅快感仲係叫人好回味,點知咁快又有升級版登場!型樣同內櫳都保持不變,原來升級嘅係引擎,本來已經飆得好爽,今次由容積2.2變3.2公升、直4引擎變V6,真係令人好期待。

記者:黎頌詩
攝影:陳偉強
Model:Hidy

估唔到係旅行車

無可否認,Alfa159Sportwagon嘅雙重個性,實在叫人着迷。作為一部旅行車,內櫳空間靈活度高、實用性夠強,應該係基本要求。159Sportwagon畀多啲,個樣勁辣有跑味,絕對係一副搶盡視線嘅跑車Look,虛榮感畀埋你,賺咗?未夠,性能及操控表現一樣跑車化,先前2.2版本已經畀人動力澎湃嘅感覺,加減波箱反應敏捷,表現相當出色。樣樣有,而且無欺場,都已經算係超標咁滿足一眾用家對座駕多元化嘅要求。𠵱家仲要喺性能動力上大升級,我不禁有啲疑惑,如果話先前嘅2.2版係旅行車扮跑車,𠵱家嘅3.2版咪變成跑車扮旅行車?

■除了設計獨特嘅車頭,Alfa最令人着迷嘅,要算似盛放花朵一樣嘅胎軨。

■流線而斯文嘅側面身影,叫你估唔到佢係辣跑一族。

■第一眼,覺得佢惡形惡相,再睇,又多咗幾分帥氣。

自動波更易操控

升級版159Sportwagon轉用咗3.2公升V6引擎,比起之前2.2公升直4引擎喺馬力同扭力上,無疑都大大提升,由0到100公里亦由2.2版中規中矩嘅9秒減至7.4秒。搭配Q4恒時四輪傳動系統,喺濕滑地面同彎路更為穩定暢順,更切合旅行車嘅身份。
另一較大改變係波箱,由電子操控離合器嘅Selespeed改為傳統機械式波箱,此消彼長下,表現究竟有乜變化?踩油去馬,Alfa招牌靚聲響起,即時上腦以為自己係車手,不過C記今勻只用自動波試車;雖換上恒時四輪驅動,但加碼嘅動力令平地起步保持強勁,加速亦相當暢順,梗係,V6引擎當然更勝一籌,彎位穩打穩紮。
3.2版堪稱驃悍,但操控上仍算平易近人,追求速度也不一定要有好高技術。加減波一如所料,反應不及Selespeed波箱敏捷,駕馭感相對遜色。

■升級版加減波駕駛感反不及2.2版。

■轉波撥片藏軚盤下,再賣車手感。

■三幅式軚盤,跑車式儀錶板,內櫳設計全面跑車化。

■最正係嗰兩盞窄長尾燈,同頭燈設計相呼應。

惡樣一見難忘

3.2版喺性能上明顯勁好多,而2.2版就畀到你更強嘅駕馭感,各有所長。再講,最強嘅性能先襯得起佢辣爆嘅外形,好慶幸升級版保留住造型霸氣十足嘅車頭設計,絲毫不變,再看,依然係要讚美。
招牌本向前凸出嘅盾形鬼面罩,兩邊V型凸起嘅線條伸延至A柱,令車頭充滿立體感,左右頭燈一開三整齊排列,十足怒目而視,氣勢逼人,個性夠強烈,C記自問一見難忘。側睇就同一般旅行車無異,較為平凡,不過內裝鋪排一樣係主力跑車化,三幅式銀黑相襯軚環已經出晒跑味,不過錶板就更有驚喜,三個冷氣出風口同三個儀錶兩列整齊排開,同車頭設計襯到絕,亦一樣風格突出!雖然C記戲言佢跑車扮旅行車,事實上,睇番內櫳,159Sportwagon的確啱晒實用旅行車嘅要求,尾廂夠大,置物空間亦夠靈活。睇得、用得兼劈得,仲想點!

■後排三座位均設有頭枕及三點式安全帶。

■話明係旅行車,俾你同大自然更加親近嘅天窗又點少得。

■新一代Alfa一列排開嘅頭燈設計,獨特而跑味濃烈。

Alfa159Sportwagon3.2規格

引擎:3,195c.c.V6
馬力:260hp/6,300rpm
扭力:322Nm/4,500rpm
傳動:6前速Q-TronicAutomatic
查詢:AutoSportivaLimited(28778788)