前嗰排，華華搵咗由中國人民銀行整出嚟嘅超級無敵game畀大家玩，今日再醒多個game畀你哋，今次唔止過吓日晨，玩得好有獎金㗎！
香港作為金融中心，特區市民點都要識番啲金融投資知識，證監會就整咗個「投資智叻闖三關」嘅遊戲。今日上去證監會「學．投資」網站（www.InvestEd.hk，見圖），就會見到3個投資故事。揀個嚟睇，睇完之後答晒相關問題。想大包圍都得，你可以睇晒3個故事，答晒咁多條問題；但1個故事交兩組答案就叫做彈弓手，要出局！
叫得過三關，就梗係唔會咁快玩完，第二關要上香港電台玩搶答，至於第三關就上有線電視玩「終極爭霸戰」。
噚日華華想上網睇吓啲問題難唔難，但網站要今日先開通，華華睇過比賽規則，嘩，終極爭霸戰會測試唔同種類嘅投資產品特性、風險，交易同交收程序，仲有作為投資者、上市公司股東同金融服務消費者嘅權益。
玩到咁大，獎品梗唔會太奀，得獎嘅冠亞季軍，分別會攞到3萬、1萬同5000蚊現金；進入終極爭霸戰嘅10位參賽者，仲可以同股評人石鏡泉食dinner，問石Sir攞啲貼士。