郭晉安昨日在九龍城拍攝吊威吔危掛在13樓外的戲份，他拍罷即大叫好驚及好high，其老婆仔歐倩怡為鼓勵老公，特地煲番茄薯仔雞腳湯給他。安仔邊說邊流露幸福甜蜜之情，有老婆的愛心靚湯，吊一百層樓都補得番！
郭晉安、鄭嘉穎和蒙嘉慧等繼前日在九龍城一大廈天台拍攝新劇《與敵同行》後，昨日眾人繼續在該處開工。
「唔敢向下望」
前日安仔由替身上陣，拍攝吊威吔墮樓戲，昨日他要親身上陣，吊威吔危掛在13樓高空，鄭嘉穎則捉着他的手欲相救，結果因威吔穿崩而NG重拍了一次，安仔說：「我寧願一take過，始終好有壓力。」
安仔雖然沒有畏高，但拍罷該場戲後也感到腳軟，他說：「好驚呀，好high呀，驚到唔敢向下望，其實安全措施做足晒，拍攝時集中精神都冇諗啲乜，係落去嗰陣同cut後上返嚟時，會諗多咗，做演員係黐黐哋，一叫action就忘我。」
嘉穎怕累街坊
安仔謂並非首次吊威吔，該場戲的難度也不算最高，他說：「之前拍一場海底戲仲難，因為我唔熟水性。」
安仔日前謂拍危險鏡頭時，事先沒有告訴太太歐倩怡，以免對方擔心，但他昨日說：「佢今日睇報紙都知啦，佢知我喺天台曬成日，所以煲咗番茄薯仔雞腳湯鼓勵我，佢話雞腳係怕我腳仔軟，番茄畀我吸收維他命，薯仔係想我唔好咁薯，型仔啲喎。」鄭嘉穎自言拍攝時十分緊張，雖然他不用吊威吔，但也怕出錯連累安仔要重拍。
採訪：王崇穎 攝影：葉君海
