澳門威尼斯人開業，威震四方，挾全球第二大、亞洲第一大建築物之威勢，鍊贏其他精心佈下風水大陣的賭坊，賭客、遊客們一家大細抱着朝拜的心情，正是唔買都睇吓，山長水遠一場去到，又點會齋睇吓唔買吓大細，於是威尼斯人大大有斬獲。
據熟悉澳門賭業的友人解釋，威尼斯人的成功在於其高瞻遠矚的市場策略，在拆得賭牌後，全速興建一所純用作給賭客博彩的金沙娛樂場，跟時間競賽，充份利用賭牌，獲利可觀，另一方面，全力策劃興建世界最大綜合賭場，徹底將拉斯維加斯的經營方法搬到澳門，不單招徠賭客，也吸引家庭客，還有開跨國會議及展覽交易的叠水商客，這一招長短棍獨步賭林，先來一招短棍金沙搶先營業，再來一記長棍威尼斯人大石責死蟹，大到可以放得落幾架珍寶747，大家就算冇賭心都有好奇心，抵佢發達。
澳門賭王何博士今次就算出到叉鵝飯都未必能夠力挽狂瀾，橫豎香港廸士尼生意都好似麻麻，不如傾吓嚟個Crossover，請來米老鼠、當奴鴨做荷官，用曾志偉聲線開盅講：「雙六一個四，十六點大」，再以白雪公主、灰姑娘供應酒水，大人有大人賭真銀，小朋友有小朋友賭代幣換毛公仔，一家大細喜洋洋。
澳門彈丸之地，有咁多間賭場，有間仲係全世界最大，賭客就嚟嚟去去係咁多，點搶客法？發展落去，真係好睇過戲。