噚日光大集團旗下嘅光大控股（165）十周年酒會，係唐雙寧第一次以集團董事長身份喺香港同傳媒見面。唐雙寧（圖）由中國銀監會副主席，跳到光大做董事長仲未夠3個月，大家都好有興趣問佢慣唔慣。
由做官轉去做企業家，究竟有乜唔同？對於呢個問題，唐董話早前拜訪光大第一任董事長王光英時，對方都有問，當時唐董即席寫咗副對聯回應：「在機關昂首挺胸做公僕，否則沒有權威；到企業貓腰低頭做主人，否則沒有錢賺」，加埋橫批四個大字「大至如此」。唔知香港啲高官俾人問到棄官從商有乜感受時，有冇唐董嘅豁達同埋文采呢呵？
至於執掌光大後諗住點搞？唐董即刻好high咁話：「希望光大更加光大，永遠光大。」跟住就入場。光大有個咁盞鬼嘅舵主，華華好期待未來嘅一番新景象。