華華曾經聽過一個傳聞，話銀行家都唔會揸跑車，因為佢哋大多保守穩陣，唔會冒大風險。不過凡事都有例外，聽聞滙豐銀行執行董事王冬勝都有架波子。
不過，傳聞始終係傳聞，又或者家吓時代唔同咗，所以銀行家都未必保守，好似蘇格蘭皇家銀行就搞咗個「蘇格蘭皇家銀行格蘭披治賽車挑戰賽」，一係唔揸，一揸就要揸一級方程式。
呢個挑戰賽係全球性比賽，要搵出全球最快嘅一級方程式賽車手，香港站下個月3至8號舉行。
香港地少人多，冇澳門個東望洋跑道，點鬥呢？Sorry，睇真啲，原來比賽喺模擬裝置上進行，就好似打機咁。3號揭幕當日，賽車專家同一級方程式賽車車隊AT&TWilliams車手AlexWurz仲會親自嚟，教參賽者點駕駛呢部超級模擬裝置。
嗱，睇到呢度，唔好以為華華點你，喺香港出線嘅車手，11月可以去西班牙嚟真嘅，喺AT&TWilliams車手指導下，揸真正嘅一級方程式賽車，喺賽道上飄移，代表香港出賽，同倫敦、新加坡、悉尼嘅車手拗手瓜，所以參加者要年滿18歲同有車牌先玩得。