西九新方案出籠，曾局長話本港文化藝術表演場地缺乏，硬件係「樽頸」，故此西九將來會建設十五項表演場地。有人話西九會變成大白象，叫政府唔好太進取。
呢日搵到戲劇K，問佢身為行內人，又是既得利益團體（劇團）代表，是否認同西九會係大白象。戲劇K立即提高聲音半度：「我係代表既得利益呀，我做戲劇、電影咁多年，靠戲劇食飯，深知缺乏場地之苦況，點解唔大聲要求政府增建場地呀？現在全港可供表演場地overbook到暈，申請宗數高出『實際可供使用』地方，達到百分之四十五。未來西九設施，以座位計。只比目前全港表演場地座位多出百分之三十七，況且七至八年後先至落成噃。橫計掂計，我都睇唔出西九點會變成大白象。」
增加場地之後，有冇劇團表演，有冇觀眾捧場呀？戲劇K話：「你同我定，呢幾年，戲劇音樂觀眾人數穩步增加，我只怕冇地方，唔怕冇觀眾。」某一啲文化評論員好多樣嘢批評噃，戲劇K亦曾為西九捱罵，呢次點解咁勇，企出嚟為西九新方案努力？戲劇K笑笑口話：「我曾幫過麥嘉拍電影，麥嘉當年贈我一句，叫我放膽去做，唔好怕人批評，佢話：ifyouaregoodatnothing,beacritic（你如果樣樣唔掂，做評論員啦！），某些文化評論員發表意見後，拍拍屁股就鬆人，我哋呢行，包括導演編劇、演員、後台人員、演藝學院學生等等，就要承受缺乏場地作長期演出之苦，冇得做就失業。我嘅舊拍檔霑叔有一句遺訓，就係：盡做，但放開。意思係做事全力以赴，做到最好，如果輸咗，唔好介懷，如果冇得就，letgo。我對西九亦係抱咁嘅態度。」
霑叔之言，值得深思。我哋做邊行，做乜事都好，都可以參考霑叔，唔好畏首畏尾，唔湯唔水。西九之成敗，好靠西九管理局，據聞對音樂歌劇有深厚認識之許老爺，本係政府屬意之選，想搵佢做西九管理局主席，但許老爺聞訊，搖頭搖到幾乎甩咗個頭。邊位會做呢？消息人士話周梁係大熱門。