噚日，孫柏文落筆寫呢篇文章嘅一刻，未知究竟聯儲局嘅決定係點。今日股市會點？大家自己執生。噚日已經講過，我最想見到聯儲局唔減息，因為就算唔想保衞美元購買力，都唔救嗰啲去得太盡嘅人。如果救咗，今次冇去得盡嘅市場參與者，就會變成儍仔，下次一定會去得盡，因為橫掂有人救。不過，我諗都係事與願違。
有太多人去得太盡嘅龍頭泡沫市場，應該非花旗國樓市莫屬。咁泡沫爆破時，需求當然會減少，不過只要供應都大幅減少，甚至比需求跌得更多，價格尋底跟住反彈嘅機會就會大增。
供應大減價格就升
以前花旗國dotcom科技股出現泡沫，爆破之後，科技公司執笠或轉型，令科技股嘅供應減少，就係一個例子。不過，樓市就唔同。起咗嘅樓，好難「銷聲匿跡」，最多只係冇新供應。大家淨係睇吓我哋特區樓市爆破之後，應該改名成為「八萬五紀念花園」嘅紅灣半島，都仲喺度。
點知，花旗國真係有個樓房市場，啲樓可以「銷聲匿跡」。呢個就係我讀大學附近嘅密芝根州Detroit。嗰度啲屋嘅價錢，已經跌到平過買車。買家，可以將買番嚟嘅屋拆散，淨係啲木材同銅線嘅價值，已經超過屋價。我諗好快，花旗國除咗出口好多有毒債券給我國之外，就會出口呢啲「二手樓宇」。
保存灣仔街市為乜
噚日，我同當年係同一間大學嘅利世民講關於呢個Detroit現象。佢話：「如果係咁，佢哋最好就係冇啲『港式』保育人士。吓吓唔畀拆，真係好難減低供應。」
我諗佢哋應該就有好多呢啲「港式」保育人士。因為去到Detroit，你就會發現有超過八成大廈，係棄置咗。冇錯，唔係冇人住，係被業主棄置。睇見一棟棟幾十層樓高，玻璃窗位已經被木板釘上嘅大廈，真係會對市區重建發人深省。
大家可能會話：「冇人住、冇人用嘅大廈，邊到會有人去保育、保衞㗎？」咁孫柏文作為一個居住喺灣仔區二十幾年嘅居民就要問你，你最後一次去灣仔街市係幾時？
後記：大家睇到呢篇文時，我已經將聯儲局決定嘅睇法放上我嘅blog度。Blog上見。仲有，聽聞黃金富將成功籌得680億元，嚟收購電盈（008）資產。相信除咗我同你之外，今時今日就連「黑石」同高盛都想知佢喺creditcrunch中，點籌呢筆資金。
金手指網誌： http://phatdat.blogspot.com